Halyk pen Jasandy intellekt jäne sifrlyq damu ministrlıgı jasandy intellekt, memlekettık qyzmetter jäne azamattar men bizneske arnalǧan sifrlyq servister salalaryndaǧy bırlesken jobalardy damytudy josparlap otyr.
Negızgı bastamalar qatarynda Halyk AI Lab zerthanasyn qūru, agrarlyq salaǧa arnalǧan Halyk Fermer sifrlyq servisın damytu, Almatyda jaŋa formattaǧy halyqqa qyzmet körsetu ortalyǧyn aşu jäne Halyk servisterın eGov Business platformasymen odan ärı integrasiialau bar.
Yntymaqtastyqtyŋ perspektivaly baǧyttaryn Premer-ministrdıŋ orynbasary – Jasandy intellekt jäne sifrlyq damu ministrı Jaslan Mädiev pen Halyk basqarma töraiymy Ümıt Şaiahmetova talqylady.
Taraptar azamattar men käsıpkerlerdıŋ memleketpen özara ıs-qimylyn jeŋıldetuge, qolmen oryndalatyn operasiialar sanyn azaituǧa jäne qyzmet alu uaqytyn qysqartuǧa mümkındık beretın sifrlyq şeşımderdı qarastyrdy. Sonymen qatar Halyk bank servisterın memlekettık sifrlyq platformalarmen odan ärı integrasiialau mümkındıkterı talqylandy.
«Mındet – qoldanystaǧy prosesterdı jai ǧana sifrlyq formatqa köşıru emes. Adamdar men biznestıŋ naqty qajettılıkterıne sai keletın, qarapaiym, jyldam ärı kündelıktı qoldanylatyn sifrlyq arnalar arqyly qoljetımdı servister qūru qajet. Halyk-tıŋ auqymdy tehnologiialyq infraqūrylymy men milliondaǧan paidalanuşysy bar. Sondyqtan memleket pen biznestıŋ mümkındıkterın bırıktırudıŋ äleuetı zor dep sanaimyz. Būl jasandy intellekt negızındegı şeşımderdı jyldam engızuge, memlekettık sifrlyq qyzmetterdı damytuǧa jäne käsıpkerlerge, fermerlerge, sondai-aq milliondaǧan qazaqstandyqqa arnalǧan jaŋa servister jasauǧa mümkındık beredı», – dedı Halyk basqarma töraiymy Ümıt Şaiahmetova.
Halyk AI Lab: jasandy intellekt şeşımderın äzırleu jäne engızu
Yntymaqtastyqtyŋ perspektivaly baǧyttarynyŋ bırı – Alem.ai bazasynda Halyk AI Lab zerthanasyn qūru. Joba jasandy intellekt negızındegı şeşımderdı äzırleuge, synaqtan ötkızuge jäne keiınnen auqymyn keŋeituge arnalǧan alaŋ retınde qarastyrylyp otyr.
Halyk AI Lab tehnologiialyq komandalardy, startaptardy jäne akademiialyq qauymdastyqty bırıktıredı dep josparlanuda. Jūmys baǧyttaryna hakatondar ötkızu, startap jobalaryn damytu, Astana IT University-men bırlesken bılım beru baǧdarlamalaryn jüzege asyru, sondai-aq jasandy intellekt şeşımderın äzırleu men synaqtan ötkızu üşın iesızdendırılgen derekterdı paidalanu kıredı.
«Digital Bridge alaŋynda maŋyzdy sifrlyq jobalardyŋ damuyna serpın beretın şeşımderdıŋ qabyldanuy asa maŋyzdy. Mūnda memleket pen biznes naqty bastamalardy talqylap, bırlesken jūmys jönınde kelısedı. Halyk-pen yntymaqtastyq jasandy intellektını engızuge, memlekettık qyzmetterdı damytuǧa jäne azamattarǧa, käsıpkerler men fermerlerge qolaily sifrlyq servister qūruǧa mümkındık beredı. Bızdıŋ ortaq mındetımız – osy bastamalardy adamdardyŋ uaqytyn ünemdeitın, biznestı jürgızudı jeŋıldetetın jäne qyzmetterdıŋ qoljetımdılıgın arttyratyn naqty şeşımderge ainaldyru», – dep atap öttı Premer-ministrdıŋ orynbasary – Jasandy intellekt jäne sifrlyq damu ministrı Jaslan Mädiev.
Mūndai format ideiany qalyptastyrudan bastap mamandardy daiarlau, tehnologiiany synaqtan ötkızu jäne ony täjıribede qoldanuǧa deiıngı tolyq sikldı ūiymdastyruǧa mümkındık beredı.
Halyk Fermer: agrarlyq salaǧa arnalǧan bıryŋǧai sifrlyq servis
Kezdesudıŋ jeke bır bölıgı agrarlyq sektorǧa arnalǧan bıryŋǧai sifrlyq ortany qūrudy közdeitın Halyk Fermer jobasyna arnaldy.
Joba bıryŋǧai IT-arhitektura qalyptastyrudy, derekterdı bırıktırudı jäne auyl şaruaşylyǧy salasyndaǧy negızgı memlekettık qyzmetterdı qaita ūiymdastyrudy qamtidy.
Maqsat – fermerlerdıŋ qajettı qyzmetterdı aluyn jeŋıldetıp, jedeldetu, ärtürlı jüielermen jūmys ısteu jäne bır aqparatty bırneşe ret ūsynu qajettılıgın azaitu.
Bolaşaqta äzırlengen şeşımder ärtürlı memlekettık jäne kommersiialyq sifrlyq arnalar arqyly qoljetımdı bolady. Būl qyzmetterdıŋ qamtu aiasyn keŋeitıp, bükıl eldegı auyl şaruaşylyǧy öndıruşılerı üşın olardy paidalanudy jeŋıldetuge mümkındık beredı.
Halyk jäne eGov Business: bizneske arnalǧan sifrlyq servister
Yntymaqtastyqtyŋ taǧy bır baǧyty – Halyk pen eGov Business arasyndaǧy bırlesken servisterdı odan ärı damytu. Olar käsıpkerdıŋ kompaniiany tırkeuden bastap kündelıktı qarjylyq operasiialar jürgızu men qarjylandyru aluǧa deiıngı negızgı qajettılıkterın qamtuy tiıs.
Qarastyrylyp jatqan şeşımder qatarynda biznestı tırkeumen qatar banktık şot aşu, derektemelerdı qolmen engızbei-aq salyqtar men äleumettık tölemderdı jürgızu, ökılettıkterdı sifrlyq formatta basqaru, banktık kepıldıkterdı räsımdeu, qarjylandyru alu bar.
Banktık jäne memlekettık servisterdı integrasiialau jeke räsımderdıŋ sanyn qysqartyp, käsıpkerlerge memleketpen jäne qarjy instituttarymen özara ıs-qimyl jasaudyŋ yŋǧaily sifrlyq jolyn qalyptastyruǧa mümkındık beredı.
Halyk SuperApp-tyŋ 8,6 million paidalanuşysy bar
Qazırgı uaqytta Halyk Qazaqstandaǧy eŋ ırı sifrlyq ekojüielerdıŋ bırın qalyptastyrǧan. Halyk SuperApp qosymşasynyŋ ai saiynǧy auditoriiasy 8,6 million paidalanuşyny qūraidy.
Bügınde qosymşada 82 memlekettık qyzmet qoljetımdı. Būl paidalanuşylarǧa qajettı servisterdı özderı üirengen sifrlyq arna arqyly aluǧa mümkındık beredı. 2026 jyly Halyk qosymşasyndaǧy memlekettık qyzmetter bölımınıŋ ai saiynǧy auditoriiasy 1,3 million paidalanuşyǧa jetken.
Sifrlyq infraqūrylym men paidalanuşylar auditoriiasynyŋ auqymy jaŋa servisterdı jyldam engızuge, halyq pen biznestıŋ memlekettık qyzmetterge qoljetımdılıgın keŋeituge mümkındık beredı.
Kezdesu qorytyndysy boiynşa taraptar bastamalardy bırlesıp pysyqtaudy jalǧastyruǧa, özara ıs-qimyl tetıkterın aiqyndauǧa jäne basym jobalar boiynşa jol kartalaryn äzırleuge kelıstı.
