فرانتسيا بيلىگى 24 قازانعا جوسپارلانعان جاپپاي نارازىلىق اكتسيالارى كەزىندە پوليتسياعا كومەكتەسۋ ءۇشىن اسكەري قىزمەتكەرلەردى جۇمىلدىرادى. ولار نىسانداردى كۇزەتىپ، قۇقىق قورعاۋ ورگاندارىنىڭ كوشەلەردەگى قاۋىپسىزدىكتى قامتاماسىز ەتۋىنە مۇمكىندىك بەرەدى. بۇل تۋرالى ەلدىڭ ىشكى ىستەر ءمينيسترى لوران نۋنەس ۇلتتىق اسسامبلەيادا مالىمدەدى، دەپ حابارلايدى «ادىرنا» ءتىلشىسى.
ء«بىز، ارينە، ىشكى قاۋىپسىزدىك كۇشتەرىنىڭ ورنىنا، ەڭ الدىمەن، نىسانداردى تۇراقتى كۇزەتۋ مىندەتتەرىن ورىنداۋ ءۇشىن Sentinelle وپەراتسياسىنا قاتىساتىن اسكەري قىزمەتكەرلەردى جۇمىلدىرامىز»، – دەدى مينيستر.
نۋنەستىڭ ايتۋىنشا، بۇل شەشىم دەمونستراتسيالار كەزىندە قوعامدىق ءتارتىپتى ساقتاۋ ءۇشىن كوبىرەك پوليتسيا قىزمەتكەرى مەن جاندارمدى تارتۋعا مۇمكىندىك بەرەدى. Sentinelle وپەراتسياسى 2015 جىلعى قاڭتاردا پاريجدە بولعان بىرقاتار تەراكتىدەن كەيىن ىسكە قوسىلعان. وپەراتسيا اياسىندا اسكەري قىزمەتكەرلەر قوعامدىق ورىندار مەن ماڭىزدى نىسانداردى كۇزەتىپ، كوشەلەردى پاترۋلدەيدى.
19 قازاندا فرانتسيا پرەزيدەنتى ەممانۋەل ماكرون جاپپاي تارتىپسىزدىكتەردەن كەيىن لوران نۋنەستىڭ وتستاۆكاسىن قابىلداۋدان باس تارتقان ەدى. BFMTV تەلەارناسىنىڭ ەليسەي سارايىنا سىلتەمە جاساپ حابارلاۋىنشا، مەملەكەت باسشىسى مينيسترگە جاپپاي ءبۇلدىرۋ ارەكەتتەرى مەن توناۋشىلىقتىڭ الدىن الۋعا باعىتتالعان قوسىمشا شارالار ازىرلەۋدى تاپسىرعان.
سول كۇنى پرەمەر-مينيستر سەباستيان لەكورنيۋ ەلدىڭ جەكەلەگەن قالالارىندا ءىشىنارا كومەندانتتىق ساعات ەنگىزۋ تۋرالى شەشىم قابىلدادى. شەكتەۋلەر بۇعان دەيىن تارتىپسىزدىكتەر بولعان ورتالىق اۋدانداردى قامتىدى.
18 قازاندا لوران نۋنەس ءومىر ءسۇرۋ قۇنىنىڭ وسۋىنە قارسى نارازىلىق اكتسيالارىنا قاتىسقان 2000-نان استام ادامنىڭ ۇستالعانىن حابارلادى. ونىڭ مالىمەتىنشە، 600-دەن استام پوليتسيا قىزمەتكەرى، جاندارم مەن ءورت ءسوندىرۋشى جاراقات العان. سونداي-اق بىرنەشە جۇزدەگەن كومپانيا شىعىنعا ۇشىراعان.
