ءساۋىردىڭ جيىرما ءۇشىن كۇنى ارمەنيانىڭ ءبىرىنشى ۆيتسە-پرەمەرى كارەن كاراپەتيان ۇكىمەتتىڭ كەزەكتەن تىس وتىرىسىن وتكىزدى.
ارمەنيا ۇكىمەتى ءباسپاسوز قىزمەتىنىڭ حابارلاۋىنشا، كەزەكتەن تىس وتىرىستا "ۇكىمەت قۇرىلىمى جانە قىزمەتى تۋرالى" زاڭنىڭ 7-بابى، 14-بولىمىنە سايكەس جانە پرەمەر-مينيستر سەرج سارگسياننىڭ وتستاۆكا تۋرالى مالىمدەمەسىنە بايلانىستى پرەمەر-ءمينيستردىڭ قىزمەتىن جالعاستىرا المايتىنى حابارلانعان.
وسىعان بايلانىستى ارمەنيا پرەمەر-ءمينيسترىنىڭ 2018 جىلعى 21 ساۋىردەگى N 412-L جارلىعىنا سايكەس پرەمەر-مينيستر بولماي قالعان نەمەسە وكىلەتىن جالعاستىرا الماي قالعان كەزدە ونىڭ جۇمىسىن ءبىرىنشى ورىنباسارى اتقارادى.
22 ءساۋىر كۇنى پرەمەر-مينيستر سەرج سارگسيان مەن وپپوزيتسيا جەتەكشىسى، دەپۋتات نيكول پاشينيان كەزدەسكەن. سارگسيان پاشينيان تالاپ ەتكەن وتستاۆكاعا قاتىستى كەلىسسوزدى جالعاستىرۋدان باس تارتىپ، زالدان شىعىپ كەتكەن. سول كۇنى پاشينيان قاماۋعا الىنعان. 23 ءساۋىر كۇنى تولقۋ كۇشەيە ءتۇسىپ، سارگسيان وتستاۆكاعا كەتەتىنىن جاريالادى. ال پاشينيان قاماۋدان بوساتىلدى.
سارگسيان سوڭعى پرەزيدەنتتىك مەرزىمى اياقتالار تۇستا 2015 جىلى ارمەنيادا ساياسي رەفورما جاساپ، كونستيتۋتسياعا وزگەرىس ەنگىزىپ، ەلدىڭ ساياسي قۇرىلىمىن كۆازي-پرەزيدەنتتىكتەن پارلامەنتتىك جۇيەگە اۋىستىرعان. 9 ساۋىردە سەرج سارگسياننىڭ جاقىن سەرىكتەرىنىڭ ءبىرى ارمەن ساركيسيان ارمەنيانىڭ جاڭا پرەزيدەنتى رەتىندە قىزمەتكە كىرىسكەن. ال سارگسياننىڭ ءوزى 17 ساۋىردە پرەمەر-مينيستر بولىپ سايلانىپ، ساياسي تاجىريبەسىن جاڭا بۋىن جەتەكشىلەرىنە ۇيرەتىپ كەتەتىنىن ايتقان ەدى. پاشينيان باستاعان وپپوزيتسيا سارگسياندى بيلىكتى جەكە دارا يەلەنۋگە تىرىسىپ جاتىر دەپ ايىپتاپ كەلگەن.
_______________________________________________________________________________________________________________________
azattyq.org
