رەسەيدە ورسك قالاسىنىڭ جۇزدەگەن تۇرعىنى قالانىڭ باس الاڭىنداعى لەنين ەسكەرتكىشى جانىنا جينالدى. ازاماتتار «پۋتين، كومەكتەس» دەپ ۇرانداتىپ، سۋ تاسقىنىنان كەيىنگى جەرگىلىكتى بيلىكتىڭ ارەكەتىنە شاعىمدانۋدا. بۇل تۋرالى بۇگىن، 8 ساۋىردە Baza telegram ارناسى جاريالادى، دەپ حابارلايدى “ادىرنا” ۇلتتىق پورتالى.
بەلگىلى بولعانداي، پوليتسيا ميتينگىنىڭ زاڭسىز ەكەنىن ايتىپ، حالىقتىڭ الاڭنان كەتۋىن تالاپ ەتكەن.
ورسك تۇرعىندارى دا وتەماقى كولەمىن ارتتىرۋدى تالاپ ەتۋدە. ونىڭ مولشەرى قازىر مۇلكىن تولىق جوعالتقانى ءۇشىن 100 مىڭ ءرۋبلدى، ال جارتىلاي جوعالتقانى ءۇشىن 50 مىڭ ءرۋبلدى قۇرايدى. جەرگىلىكتى تۇرعىندار بۇل اقشا سۋ تاسقىنىنا بايلانىستى شىعىنداردى وتەي المايتىنىن ايتادى.
ايتا كەتەيىك، قازاق تاريحىندا ورسك قالاسى جامانقالا دەگەن اتپەن بەلگىلى. ورىنبور وبلىسىنداعى ەكىنشى ۇلكەن قالا. ورسكىنىڭ ىرەسىندە قازاق اۋىلدارى ءالى دە بار.
