كرەمل قازاقستان پرەزيدەنتى قاسىم-جومارت توقاەۆتىڭ گەرمانيا كانتسلەرى فريدريح مەرتسپەن وتكەن ءباسپاسوز ءماسليحاتىندا رەسەي باسشىسى ۆلاديمير پۋتينگە بەرگەن باعاسىن جوعارى باعالايدى. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمدەدى، دەپ حابارلايدى «ادىرنا» ءتىلشىسى ريا نوۆوستيگە سىلتەمە جاساپ.
«ارينە، ءبىز قازاقستان پرەزيدەنتىنىڭ ۆلاديمير پۋتينگە بەرگەن باعاسىن جوعارى باعالايمىز جانە وعان ريزاشىلىعىمىزدى بىلدىرەمىز. قازاقستانمەن اراداعى قارىم-قاتىناسىمىزدى، ەكىجاقتى بايلانىستارىمىزدى ەرەكشە قادىرلەيمىز»، – دەدى پەسكوۆ جۋرناليستەرگە.
تاسس اگەنتتىگىنىڭ حابارلاۋىنشا، پەسكوۆ ەكى ەل پرەزيدەنتىنىڭ جەكە قارىم-قاتىناسى جاقىن، سىندارلى ءارى سەنىمگە نەگىزدەلگەنىن ايتتى. ونىڭ سوزىنشە، بۇل ولاردىڭ حالىقارالىق كۇن تارتىبىندەگى ەڭ كۇردەلى ماسەلەلەردى، سونىڭ ىشىندە ۋكرايناداعى جاعدايدى رەتتەۋ ماسەلەلەرىن دە اشىق تالقىلاۋىنا مۇمكىندىك بەرەدى.
بۇعان دەيىن قاسىم-جومارت توقاەۆ فريدريح مەرتسپەن وتكەن ءباسپاسوز ءماسليحاتىندا ۆلاديمير ءپۋتيندى قازاقستان، ورتالىق ازيا، ەۋروپا جانە الەم ءۇشىن ەڭ قولايلى ساياسي تۇلعالاردىڭ ءبىرى دەپ سانايتىنىن ايتقان بولاتىن. توقاەۆ رەسەي پرەزيدەنتىنىڭ «كۇردەلى تاريحى بار ءىرى مەملەكەتتى باسقارۋعا قاجەتتى قاسيەتتەرگە يە ەكەنىن، سونداي-اق ءوز ەلى الدىنداعى ستراتەگيالىق ماقساتتاردى تەرەڭ تۇسىنەتىنىن» اتاپ ءوتتى.
سول ءباسپاسوز ءماسليحاتىندا مەملەكەت باسشىسى ۋكراينا اۋماعىنداعى قاقتىعىستى توقتاتىپ، ديپلوماتيالىق نەمەسە وزگە دە كەلىسسوزدەر ۇدەرىسىنە كوشۋ قاجەتتىگىن تاعى دا كوتەردى.
وسىعان ۇقساس مالىمدەمەنى توقاەۆ بيىل شىلدە ايىندا ومبى قالاسىندا ۆلاديمير پۋتينمەن كەزدەسۋى كەزىندە دە جاساعان ەدى. بۇعان جاۋاپ رەتىندە رەسەي پرەزيدەنتى اسكەري وپەراتسيانىڭ بارىسى تۋرالى جان-جاقتى اقپارات بەرگەن. كەيىن دميتري پەسكوۆ كيەۆتىڭ ۇستانىمىن ەسكەرە وتىرىپ، «قاقتىعىستى توقتاتىپ قويۋ قازىرگى جاعدايدا مۇمكىن ەمەس» ەكەنىن مالىمدەگەن.
