تۇركپا-نىڭ وتىرىسى شەڭبەرىندە قۇرىلتاي توراعاسى ايبەك دادەباي قىرعىزستان جوگوركۋ كەنەشىنىڭ توراعاسى مارلەن ماماتاليەۆپەن كەزدەستى.
ايبەك دادەباي ارىپتەسىن قىرعىزستان تاۋەلسىزدىگىنىڭ 35 جىلدىعىمەن قۇتتىقتاپ، قوناقجاي پەيىلى ءۇشىن ريزاشىلىق ءبىلدىردى. سونداي-اق قىرعىزستان پارلامەنتىمەن ەكىجاقتى قارىم-قاتىناستى پارلامەنتارالىق ىنتىماقتاستىق جونىندەگى كەڭەس، دوستىق توبى جانە سالالىق كوميتەتتەر اياسىندا بارلىق دەڭگەيدە ودان ءارى دامىتۋ قۇرىلتاي ءۇشىن ەرەكشە ماڭىزدى ەكەنىن اتاپ ءوتتى.
– پرەزيدەنتتەرىمىز قاسىم-جومارت كەمەلۇلى توقاەۆ پەن سادىر نۇرعوجاۇلى جاپاروۆتىڭ ساياسي ەرىك-جىگەرى مەن سىندارلى ساياساتىنىڭ ارقاسىندا ەلدەرىمىز اراسىنداعى قارىم-قاتىناس قارقىندى دامىپ كەلەدى. بۇل قازاقستان رەسپۋبليكاسى مەن قىرعىز رەسپۋبليكاسى اراسىنداعى وداقتاستىق قاتىناستاردى تەرەڭدەتۋ جانە كەڭەيتۋ تۋرالى شارتتا كورىنىس تاپتى. بۇگىنگى ماقساتىمىز – پرەزيدەنتتەرىمىزدىڭ ۋاعدالاستىقتارىن زاڭنامالىق تۇرعىدان قامتاماسىز ەتۋ، – دەپ اتاپ ءوتتى قۇرىلتاي توراعاسى.
ايبەك دادەباي قىرعىز ارىپتەسىنە مەملەكەت باسشىسىنىڭ باستاماسىمەن قازاقستاندا جۇرگىزىلىپ جاتقان اۋقىمدى ساياسي جانە كونستيتۋتسيالىق رەفورمالار تۋرالى اقپارات بەردى. جاڭا حالىقتىق كونستيتۋتسياعا سايكەس، ءبىر پالاتالى قۇرىلتاي، ۆيتسە-پرەزيدەنت ينستيتۋتى جانە مۇلدە جاڭا كونسۋلتاتيۆتىك ورگان – قازاقستان حالىق كەڭەسى قۇرىلدى.
ءوز كەزەگىندە مارلەن ماماتاليەۆ قازاقستان مەن قىرعىزستان باسشىلارىنىڭ ەكىجاقتى نەگىزدە دە، كوپجاقتى الاڭداردا دا ءوزارا تۇسىنىستىگى مەن تابىستى ءىس-قيمىلىن اتاپ ءوتتى. جوگوركۋ كەنەشتىڭ توراعاسى قازاقستاندىقتاردى جۇرگىزىلگەن رەفورمالارعا قاتىستى قۇتتىقتاپ، قۇرىلتاي دەپۋتاتتارىنا جەمىستى جۇمىس تىلەدى.
تاراپتار زاڭ شىعارۋ قىزمەتىندەگى تاجىريبە الماسۋدى ودان ءارى كەڭەيتۋ، ءتۇرلى پارلامەنتارالىق ۇيىمدار مەن حالىقارالىق بىرلەستىكتەر اياسىنداعى بىرلەسكەن جۇمىستى كۇشەيتۋ ماسەلەلەرىن دە تالقىلادى. مۋزىكا، تەاتر، كينو جانە سپورتتى قوسا العاندا، مادەني-گۋمانيتارلىق سالاداعى ىنتىماقتاستىقتى دامىتۋعا دا ەرەكشە نازار اۋدارىلدى.
