قۇرىلتاي سايلاۋىنا دەيىن كۇن جاقىنداعان سايىن سايلاۋالدى ناۋقان دا ۇراننان گورى ناقتى ۇسىنىستارعا كوبىرەك سۇيەنە باستادى. كەشە پارتيالار پىكىرتالاستى تەلەەفيردەن قوعامنىڭ ناقتى سۇرانىسى قالىپتاساتىن ورىندارعا – ءوندىرىس ورىندارىنا، الەۋمەتتىك مەكەمەلەرگە جانە وڭىرلىك جۇمىسپەن قامتۋ ورتالىقتارىنا الىپ شىقتى. ال باعدارلامالار مازمۇندى ءارى ناقتىلانا تۇسكەن سايىن، پارتيالار اراسىنداعى پىكىرتالاس تا جالپى ۇرانداردان گورى قارسىلاستارى ۇسىنعان ناقتى باستامالار مەن شەشىمدەر توڭىرەگىندە ءوربي باستادى.
مىنبەر ورنىنا زاۋىتتار: پارتيالار ونەركاسىپ وڭىرلەرىنىڭ قولداۋىنا يە بولۋعا ۇمتىلۋدا
قاراعاندى وبلىسىندا ايبەك داداباي باستاعان «ادىلەت» پارتياسىنىڭ دەلەگاتسياسى «Qarmet» اق ەڭبەك ۇجىمىمەن كەزدەستى. كەزدەسۋ بارىسىندا ءوندىرىس ورىندارىن جاڭعىرتۋ، ەڭبەك قاۋىپسىزدىگىنە باقىلاۋدى كۇشەيتۋ جانە يندۋستريالىق قالالار ءۇشىن بىلىكتى كادرلار دايارلاۋ ماسەلەلەرى تالقىلاندى.
وسىعان ۇقساس باعىتتى قازاقستان حالىق پارتياسى دا ۇستاندى. الايدا پارتيا ءوندىرىس ورنىنا ەمەس، تسيفرلىق دامۋ ماسەلەسىنە باسىمدىق بەردى. باتىس قازاقستان وبلىسىندا پارتيا وكىلدەرى «ازاماتتارعا ارنالعان ۇكىمەت» مەملەكەتتىك كورپوراتسياسى فيليالىنىڭ ۇجىمىمەن كەزدەسىپ، ەلەكتروندىق سەرۆيستەردى دامىتۋ جانە تسيفرلىق باقىلاۋ تەتىكتەرىن جەتىلدىرۋ ماسەلەلەرىن تالقىلادى.
الەۋمەتتىك كۇن ءتارتىبى: قارتتار ۇيىنەن پوشتا بولىمشەسىنە دەيىن
جسدپ سايلاۋالدى ناۋقانىن حالىقتىڭ الەۋمەتتىك تۇرعىدان وسال توپتارىن قولداۋ ماسەلەلەرى توڭىرەگىندە جالعاستىرۋدا. پارتيا اتىنان كانديدات نۇريا بالتابايقىزى جەزقازعان قالاسىنداعى «ۇلىتاۋ مەيىرىمى» مۇمكىندىگى شەكتەۋلى جاندارعا ارنالعان قولداۋ ورتالىعىندا جانە قارتتار ۇيىندە بولدى.
ءوز كەزەگىندە «اۋىل» پارتياسى شالعاي ەلدى مەكەندەردىڭ ينفراقۇرىلىمىن دامىتۋعا باسىمدىق بەردى. قوستانايدا پارتيا توراعاسى قايرات ايتۋعانوۆ دەپۋتاتتىققا كانديداتتارمەن بىرگە «قازپوشتا» اق فيليالىنىڭ ۇجىمىنا پارتيانىڭ سايلاۋالدى باعدارلاماسىن تانىستىردى. كەزدەسۋدە اۋىلدىق اۋماقتاردى قولداۋ، جاڭا جۇمىس ورىندارىن قۇرۋ جانە جەرگىلىكتى ءوزىن-ءوزى باسقارۋدى دامىتۋ ماسەلەلەرى ءسوز بولدى.
«بايتاق» پارتياسى دا ءوزىنىڭ ەكولوگيالىق باعىتىن جالعاستىرۋدا. پارتيا كانديداتى ۆلاديمير مارتەل تالعارداعى الماتى مەملەكەتتىك تابيعي قورىعىنىڭ قىزمەتكەرلەرىمەن كەزدەسىپ، بيوالۋانتۇرلىلىكتى ساقتاۋ جانە ەرەكشە قورعالاتىن تابيعي اۋماقتاردى قورعاۋ ماسەلەلەرىن تالقىلادى.
باعدارلامالار تارتىسى: پىكىرتالاس ناقتى باستامالار توڭىرەگىنە ويىستى
كەشە ەكولوگيا مەن ەكونوميكا توعىسقان تۇستا پارتيالار اراسىنداعى العاشقى ەلەۋلى پىكىر قايشىلىعى بايقالدى. قازاقستان حالىق پارتياسى جسدپ-نىڭ ەكولوگيالىق تالاپتاردى بۇزعان كاسىپورىنداردىڭ قىزمەتىن ۋاقىتشا توقتاتۋ تۋرالى باستاماسىن سىنعا الدى. پارتيانىڭ پىكىرىنشە، مۇنداي قادام جالاقىنىڭ كەشىگۋىنە جانە جۇمىس ورىندارىنىڭ قىسقارۋىنا اكەلۋى مۇمكىن. ونىڭ ورنىنا قحپ كاسىپورىنداردى مەملەكەتتىك قولداۋ ارقىلى جاڭعىرتىپ، ەكولوگيالىق تازا تەحنولوگيالاردى ەنگىزۋدى ۇسىنادى.
ەكونوميكالىق باعىتتاعى پىكىرتالاس تا جالعاسىن تاپتى. «اق جول» پارتياسى اقتوبەدە جاس كاسىپكەرلەردى، IT سالاسىنىڭ جانە بانك سەكتورىنىڭ وكىلدەرىن بىرىكتىرگەن بيزنەس-ستارتاپتار فورۋمىن وتكىزدى. پارتيا توراعاسى دانيا ەسپاەۆا شاعىن جانە ورتا بيزنەستى قولداۋعا باعىتتالعان سايلاۋالدى باعدارلامانىڭ نەگىزگى باستامالارىن تانىستىردى.
الايدا ءدال وسى ەكونوميكالىق ۇسىنىستار Respublica پارتياسىنىڭ سىنىنا ۇشىرادى. پاۆلودارداعى «قىزىلجار-قۇس KZ» قۇس فابريكاسىنىڭ ۇجىمىمەن كەزدەسۋدە پارتيا كانديداتى ماحامبەت حاسەنوۆ «اق جولدىڭ» الەۋمەتتىك ماڭىزى بار ازىق-تۇلىك تاۋارلارى باعاسىن مەملەكەتتىك رەتتەۋدەن شىعارۋ تۋرالى باستاماسىن تاۋەكەلى جوعارى شەشىم دەپ باعالادى. ونىڭ ايتۋىنشا، الدىمەن وتاندىق ءوندىرىستى كۇشەيتىپ، حالىقتىڭ تابىسىن ارتتىرۋ قاجەت.
بۇعان جاۋاپ رەتىندە «اق جول» پارتياسىنىڭ وكىلى يۋري لي پارتيا باعدارلاماسىنداعى ازاماتتاردىڭ جەكەلەگەن ساناتتارىنا قاتىستى سالىق سالۋ ماسەلەلەرى جونىندەگى ۇستانىمىن ءتۇسىندىردى.
ءبىر ەرەكشەلىگى – ءدال «اق جول» مەن Respublica پارتيالارى ءوزارا پىكىرتالاسقا وزگەلەرگە قاراعاندا جيىرەك تۇسۋدە. ويتكەنى ەكى پارتيا دا بىردەي ەلەكتورالدىق اۋديتوريانىڭ قولداۋىنا يە بولۋعا ۇمتىلىپ جاتىر.
ءارتۇرلى كۇن ءتارتىبىن بىرىكتىرەتىن ورتاق ماقسات
كوتەرىلگەن تاقىرىپتاردىڭ اۋقىمى كەڭ بولعانىنا قاراماستان – زاۋىتتاردان باستاپ تابيعي قورىقتارعا دەيىن – پارتيالاردىڭ بارلىعى سول كۇنى قوعامنىڭ ءبىر ورتاق سۇرانىسىنا جاۋاپ بەرۋگە ۇمتىلدى: وزگەرىستەردىڭ ناقتى ناتيجەسىن كورسەتۋ. ءبىرى مۇنى ءتيىمدى مەملەكەتتىك باسقارۋ مەن بەرىك ينستيتۋتتار ارقىلى كورسە، ەندى ءبىرى الەۋمەتتىك قورعاۋ مەن اۋىلدى دامىتۋعا باسىمدىق بەرەدى. ال وزگەلەرى ەكولوگيانى قورعاۋدى نەمەسە كاسىپكەرلىكتى دامىتۋعا قولايلى جاعداي جاساۋدى نەگىزگى باعىت رەتىندە ۇسىنادى.
