13 قاراشا، استانا. قر قۇرىلتايىنىڭ دەپۋتاتى المات ابدىكەشوۆتىڭ قوعامدىق قابىلداۋىندا اقمولا وبلىسى تسەلينوگراد اۋدانىنا قاراستى توڭكەرىس اۋىلىنىڭ تۇرعىنى فايما يسينا جەكە ماسەلەسىمەن جۇگىندى. زەينەتكەردىڭ ءوتىنىشى كرەديتتىك بەرەشەكتى وتەۋ قيىندىعىنا جانە بانك الدىنداعى مىندەتتەمەلەرىن قايتا قاراۋعا قاتىستى بولدى.
ف. يسينا سەگىز جىل بۇرىن زەينەتكەرلىككە شىققانىمەن، كۇنكورىس قامىمەن ەڭبەك ەتۋىن جالعاستىرعان. 15 جىلدان استام ۋاقىت بويى تۇرىپ كەلە جاتقان ءوز ۇيىنە جوندەۋ جۇرگىزۋ ءۇشىن 4 ميلليون تەڭگە كولەمىندە نەسيە راسىمدەگەن. العاشقى ەكى جىلدا قارجىلىق مىندەتتەمەسىن ءمىنسىز ورىنداپ، اي سايىن 163 مىڭ تەڭگەدەن تولەپ كەلگەن.
الايدا ءۇش اي بۇرىن دەنساۋلىعى كۇرت سىر بەرىپ، جۇمىسىن توقتاتۋعا ءماجبۇر بولعان. سودان بەرى جالعىز تابىس كوزى – زەينەتاقىسى. ونىڭ ءوزى اي سايىنعى نەسيە تولەمىن وتەۋگە جەتپەيدى. اتاپ ايتقاندا، زەينەتاقىسى 137 مىڭ تەڭگەنى قۇراسا، بانككە تولەۋگە ءتيىس اي سايىنعى سوماسى 162 مىڭ تەڭگە بولعان.
زەينەتكەردىڭ ايتۋىنشا، بانككە قارىزدى قايتا قاراۋ تۋرالى ءوتىنىش بىلدىرگەنىمەن، ءوتىنىشى قاناعاتتاندىرىلماعان. كەرىسىنشە، زەينەتاقىسىنتولىقتاي ۇستاپ قالۋ، ءتىپتى باسپاناسىنان ايىرىلۋ قاۋپى بار ەكەنى ەسكەرتىلگەن.
ازاماتتىڭ ءوتىنىشىن نازارعا العان دەپۋتات ا. ابدىكەشوۆ ماسەلەنى وڭتايلى شەشۋ ماقساتىندا ءتيىستى جۇمىس جۇرگىزدى. ناتيجەسىندە بانكپەن كەلىسسوزدەر ۇيىمداستىرىلىپ، زەينەتكەردىڭ الەۋمەتتىك جاعدايى مەن تولەم قابىلەتى ەسكەرىلە وتىرىپ، وعان قولايلى تولەم كەستەسىن بەكىتۋ جونىندە كەلىسىمگە قول جەتكىزىلدى.
سونىمەن قاتار اي سايىنعى نەسيە تولەمىن زەينەتاقىسىنىڭ 50 پايىزى كولەمىندە وتەۋ ماسەلەسى كەلىسىلدى. بۇدان بولەك، كرەديتتىڭ نەگىزگى قارىزىنا ەسەپتەلگەن پايىزداردى الىپ تاستاۋ جونىندەگى ماسەلە دە وڭ شەشىمىن تاپتى.
وسىلايشا، دەپۋتاتتىڭ ارالاسۋى ارقىلى زەينەتكەردىڭ ۇزاق ۋاقىتتان بەرى قوردالانعان ماسەلەسى شەشىمىن تاپتى. ەڭ باستىسى، قارجىلىق قيىندىققا تاپ بولعان كەيۋانانىڭ ەڭسەسى تىكتەلىپ، ءوز شاڭىراعىن ساقتاپ قالۋعا مۇمكىندىك تۋدى.
ايتا كەتەيىك، قۇرىلتاي دەپۋتاتتارىنىڭ قوعامدىق قابىلداۋى – ازاماتتاردىڭ ءوتىنىش-تىلەگىن تىڭداپ قانا قويماي، تۇيتكىلدى ماسەلەلەردىڭ ءتۇيىنىن تارقاتۋعا باعىتتالعان ماڭىزدى الاڭ. مۇندا ەلىمىزدىڭ كەز كەلگەن ازاماتى ءوز وتىنىشىمەن جۇگىنە الادى.
اعىمداعى جىلدىڭ قىركۇيەك-قازان ايلارىندا قۇرىلتاي دەپۋتاتتارى 400-دەن استام ازاماتتى جەكە قابىلداعان. وتىنىشتەردىڭ باسىم بولىگى باسپانا، جۇمىسپەن قامتۋ جانە الەۋمەتتىك كومەك كورسەتۋ ماسەلەلەرىنە قاتىستى بولعان
