پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى ايتقۇرمان وماربەكوۆتى جانە قورعانىس ءمينيسترىنىڭ ورىنباسارى تاتيانا ساۆەلەۆانى قابىلدادى. بۇل تۋرالى 19 قازاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەت باسشىسى قارۋلى كۇشتەردىڭ قازىرگى قىزمەتى مەن جاۋىنگەرلىك ازىرلىگى، اسكەري دايارلىق ءىس-شارالارىن قارجىلاي قامتاماسىز ەتۋ، قورعانىس مينيسترلىگى بيۋدجەتىنىڭ ورىندالۋى تۋرالى ەسەپتى تىڭدادى.
جوعارعى باس قولباسشىعا جاۋىنگەرلەردىڭ جاي-كۇيى مەن اسكەردى جۇمىلدىرۋ دايىندىعى، سونداي-اق ۆەدومستۆو ورگاندارىنا جانە ساربازدارعا جۇكتەلگەن مىندەتتەردىڭ ورىندالۋى تۋرالى باياندالدى.
پرەزيدەنتكە اسكەردىڭ اعىمداعى قاجەتتىلىكتەرىن قارجىلاندىرۋ جانە ارميانى دامىتۋ باعدارلاماسى تۋرالى مالىمەت بەرىلدى. سونداي-اق اسكەري ازىرلىك مىندەتتەرىن ەسكەرە وتىرىپ قاراجاتتى قايتا ءبولۋ، ينفراقۇرىلىمدى جاراقتاندىرۋ جانە بولىمشەلەردىڭ كۇندەلىكتى قىزمەتىن قامتاماسىز ەتۋ ماسەلەلەرى تالقىلاندى.
اسكەردى باسقارۋ جۇيەسىن جەتىلدىرۋ، شەشىم قابىلداۋ جەدەلدىگىن ارتتىرۋ جانە ساربازدىڭ ماماندانعان باعىتىنا قاراي مىندەتتەردى ورىنداۋعا دايىندىعىنا ايرىقشا ءمان بەرىلدى.
بۇدان بولەك، موبيليزاتسيانى جوسپارلاۋ جانە اسكەري رەزەرۆتى دايىنداۋ، جوسپارلانعان شىعىنداردى نەگىزدەۋ، بيۋدجەت ءتارتىبىن ساقتاۋ، بولىنگەن قارجىنى پايدالانۋ تيىمدىلىگىن ارتتىرۋ ماسەلەلەرى، سونداي-اق قارجىلىق باقىلاۋ مەن شىعىستاردىڭ ناتيجەلىلىگىن باعالاۋ تاسىلدەرى قاراستىرىلدى.
كەزدەسۋ قورىتىندىسى بويىنشا مەملەكەت باسشىسى قارۋلى كۇشتەردىڭ ساقاداي ساي بولۋىنا جانە اسكەري ازىرلىك ساپاسىنا قاتىستى، سونىمەن قاتار ارميانىڭ ەڭ باستى قاجەتتىلىكتەرىن قارجىلىق تۇرعىدان وتەۋ جانە بيۋدجەت قاراجاتىن ۇتىمدى پايدالانۋ ماسەلەلەرى بويىنشا بىرقاتار مىندەت جۇكتەدى.
ايتا كەتەيىك، 24 قىركۇيەكتە ماڭعىستاۋ وبلىسىندا اسكەري-تەڭىز كۇشتەرىنىڭ وقۋ-جاتتىعۋى كەزىندە 17 تەڭىزشى كاسپي تولقىنىنا اعىپ كەتكەن. ۇشەۋى قۇتقارىلىپ، 14 تەڭىزشى قازا تاپتى. وقيعاعا بايلانىستى قىلمىستىق ءىس قوزعالىپ، بىرنەشە اسكەري باسشى كۇدىكتى دەپ تانىلدى. سول كەزدەگى مينيستر مەن باسقا دا قورعانىس سالاسىنداعى لاۋازىم يەلەرى قىزمەتتەن بوساتىلىپ، مينيسترلىك قۇرامىنا جاڭا ادامدار تارتىلدى. قايعىلى جاعدايدان سوڭ قورعانىس مينيسترلىگىندەگى ىستەردىڭ جاي-كۇيىنە كەشەندى تەكسەرۋ جۇرگىزۋ جونىندەگى ارنايى كوميسسيا قۇرىلىپ، جۇمىس ىستەپ جاتىر.
