بۇگىن، 1 شىلدەدە پرەزيدەنت قاسىم-جومارت توقاەۆ Air Astana كومپانياسىنىڭ باس اتقارۋشى ديرەكتورى يبراگيم جانلىەلدى قابىلدادى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
مەملەكەت باسشىسىنا ورتالىق ازيا مەن كاۆكازدا جەتەكشى ورىن الاتىن Air Astana كومپانياسىنىڭ وپەراتسيالىق جانە قارجىلىق كورسەتكىشتەرى تۋرالى مالىمەت بەرىلدى.
قاسىم-جومارت توقاەۆقا Air Astana اۋە پاركىن 2026-2027 جىلدارى Boeing 787 Dreamliner جاڭا بۋىن ۇشاقتارىمەن تولىقتىرۋدى جوسپارلاپ وتىرعانى باياندالدى.
كومپانيا Airbus A320neo جانە A321neo ماركالى 50 ۇشاققا جانە Boeing 787-9 ماركالى 15 اۋە كەمەسىنە تاپسىرىس بەرگەن. ولار 2036 جىلعا دەيىن جەتكىزىلەدى.
يبراگيم جانلىەل پرەزيدەنتكە كومپانيانىڭ ۇزاقمەرزىمدى دامۋ ستراتەگياسىن تانىستىردى. اتالعان قۇجات قازاقستاننىڭ وڭىرلىك اۆياتسيالىق حاب رەتىندەگى ورنىن نىعايتۋعا جانە كومپانيا قىزمەتىن حالىقارالىق دەڭگەيدە كەڭەيتۋگە باعىتتالعان.
Air Astana باعىت سانىن كوبەيتىپ، ءمۋلتيمودالدى تاسىمالدى دامىتۋدى، سونداي-اق ۇشۋ جيىلىگىن ۇلعايتۋدى جوسپارلاپ وتىر. تسيفرلاندىرۋ مەن جاڭا تەحنولوگيالاردى ەنگىزۋگە باسا ءمان بەرىلەدى.
قاسىم-جومارت توقاەۆ اۋە پاركىن تولىقتىرۋ، باعىتتار جەلىسىن ارتتىرۋ جانە تاسىمالداۋ الەۋەتىن نىعايتۋ سەكىلدى ستراتەگيالىق ماقساتتاردى ءتيىمدى ىسكە اسىرۋدىڭ ماڭىزىنا توقتالدى. پرەزيدەنت اقش جانە جاپونيا ەلدەرىمەن تىكەلەي اۋە تاسىمالىن ۇيىمداستىرۋدى باسىمدىق رەتىندە اتادى.
مەملەكەت باسشىسى رەيستىڭ كەشىگۋى، بورتتىڭ اۋىسۋى سەكىلدى جولاۋشىلار تاراپىنان ۇنەمى سىن ايتىلاتىن ماسەلەلەرگە نازار اۋدارىپ، قازاقستاندىقتار ءجيى ساياحاتتايتىن ەلدەرمەن اۋە تاسىمالىن دامىتۋعا شاقىردى.
