جارىلىس قاۋپىنە بايلانىستى تەل-اۆيۆتەن ۇشقان Austrian Airlines ۇشاعى سوفياعا شۇعىل قوندى. بولگاريا اسكەري-اۋە كۇشتەرى اۋە كەمەسىن الىپ ءجۇرۋ ءۇشىن ميگ-29 جويعىش ۇشاعىن كوككە كوتەرگەن، دەپ حابارلايدى «ادىرنا» ءتىلشىسى euronews.com-عا سىلتەمە جاساپ.
Austrian Airlines اۋە كومپانياسىنىڭ تەل-اۆيۆتەن ۆەناعا باعىت العان ۇشاعى بومبا قويىلعانى تۋرالى حابارعا بايلانىستى جەكسەنبى كۇنى بولگارياعا باعىت الۋعا ءماجبۇر بولعان. بۇل تۋرالى بولگاريا بيلىگى مەن اۋە كومپانياسى مالىمدەدى.
بولگاريا كولىك مينيسترلىگىنىڭ حابارلاۋىنشا، رۋمىنياعا جاقىنداعان كەزدە ەكيپاجعا بومبا تۋرالى قوقان-لوقى جاسالعان. وسىدان كەيىن Austrian Airlines ۇشاعىنىڭ ەكيپاجى سوفياعا شۇعىل قونۋ تۋرالى شەشىم قابىلداعان. مينيسترلىك وكىلدەرى ۇشاق جەرگە قونعان سوڭ جولاۋشىلاردىڭ اۋە كەمەسىنەن ەۆاكۋاتسيالانعانىن ايتتى.
مينيسترلىكتىڭ مالىمەتىنشە، بەلگىلەنگەن تارتىپكە سايكەس بولگاريانىڭ اسكەري-اۋە كۇشتەرى لاينەردى الىپ ءجۇرۋ ءۇشىن ميگ-29 جويعىش ۇشاعىن كوككە كوتەرگەن.
ۇشاق بورتىندا 51 جولاۋشى مەن ەكيپاجدىڭ التى مۇشەسى بولعان. قاۋىپ تۋرالى حابار تۇسكەننەن كەيىن شامامەن جارتى ساعات وتكەندە Airbus A320 ۇشاعى سوفيا اۋەجايىنا ءساتتى قونعان. ودان كەيىن اۋە كەمەسىن قاۋىپسىزدىك قىزمەتتەرى تەكسەرگەن.
«ۇشاقتى تەكسەرۋ اياقتالعان سوڭ جولاۋشىلار مۇمكىندىگىنشە تەز ارادا باسقا رەيستەرگە قايتا تىركەلەدى»، – دەپ حابارلادى اۋە كومپانياسى.
Flightradar24 سەرۆيسىنىڭ مالىمەتىنشە، OE-LZE تىركەۋ ءنومىرى بار ۇشاق شامامەن ساعات 21:10-دا رۋمىنيانىڭ اۋە كەڭىستىگىنە كىرگەن. كەيىن وڭتۇستىككە بۇرىلىپ، بولگاريا باعىتىنا كەرى قايتقان جانە سوفياعا قونعان.
ال ADS-B Exchange اۋە رەيستەرىن باقىلاۋ پلاتفورماسىنىڭ دەرەكتەرىنە سايكەس، شامامەن وسى ۋاقىتتا ۇشاقتىڭ ترانسپوندەرى 7700 كودىن تاراتقان. بۇل كود جالپى توتەنشە جاعدايدى بىلدىرەدى.
بولگاريانىڭ كولىك مينيسترلىگى داعدارىس جاعدايىنا دەن قويۋ جونىندەگى شتاب قۇرىلعانىن جانە قۇزىرلى ورگاندار وقيعانى تەرگەۋگە كىرىسكەنىن حابارلادى.
وتكەن ايدىڭ سوڭىندا دا وسىعان ۇقساس وقيعا بولعان. دۋبايدان تەل-اۆيۆكە باعىت العان flydubai اۋە كومپانياسىنىڭ رەيسىندە ەكىنشى ۇشقىش اۋە كەمەسىنىڭ كومانديرىنە شابۋىل جاساپ، ۇشاقتى قاساقانا اپاتقا ۇشىراتۋعا ارەكەتتەنگەن ەدى. الايدا ونى كاپيتان، جولاۋشىلار مەن ەكيپاج مۇشەلەرى توقتاتقان.
ال وتكەن اپتادا گرەكيانىڭ كورفۋ كۋرورتتىق ارالىنان گەرمانيانىڭ نيۋرنبەرگ قالاسىنا باعىت العان ۇشاقتان اۋە كەمەسىن باسىپ الۋ تۋرالى قاتە دابىل بەرىلگەن. وسىدان كەيىن حورۆاتيا مەن گەرمانيانىڭ اسكەري-اۋە كۇشتەرى جويعىش ۇشاقتارىن شۇعىل تۇردە اۋەگە كوتەرگەن.
