Kreml basşysy Vladimir Putin qaraşada AQŞ prezidentı Donald Tramp jäne Qytai töraǧasy Si Szinpinmen kezdesıp, Ukrainadaǧy jaǧdaidy talqylaudy ūsyndy. Kezdesudıŋ maqsaty — soǧysty Mäskeuge tiımdı şarttarmen aiaqtau jönınde kelısımge kelu. Būl turaly Wall Street Journal basylymy jazdy, dep habarlaidy «Adyrna» tılşısı.
Basylymnyŋ mälımetınşe, Resei kelıssözderdı 18-19 qaraşa künderı Qytaidyŋ Şenchjen qalasynda ötetın Aziia-Tynyq mūhity ekonomikalyq yntymaqtastyǧy sammitı aiasynda ötkızudı ūsynǧan.
Resei prezidentınıŋ baspasöz hatşysy Dmitrii Peskov mūndai kezdesudıŋ ötkızılu mümkındıgı talqylanyp jatqanyn rastaǧan.
«Kezdesudıŋ özı nemese onyŋ yqtimal kün tärtıbı turaly äzırge naqty tüsınık joq. Degenmen üş tarap ta mūndai kezdesudıŋ ötu mümkındıgın joqqa şyǧarmaidy», — dedı ol basylymǧa bergen jauabynda.
AQŞ äkımşılıgındegı joǧary lauazymdy ökıldıŋ aituynşa, Aq üi basşysy äzırge mūndai sammit ötkızuge kelısım bermegen. Alaida ol būl ūsynysqa oŋ közqaras tanytuy mümkın.
WSJ basylymy Resei barlau qyzmetınıŋ būrynǧy qyzmetkerıne sılteme jasap, Kreml būl ūsynysty 9 qazanda Tramppen telefon arqyly söilesu kezınde jetkızgenın jazdy. Sondai-aq äŋgıme barysynda Reseiden AQŞ-qa dizel otynyn jetkızu turaly kelısımge qol jetkızılgenı aitylǧan.
16 qazanda Tramp jarlyq arqyly Mäskeuge qarsy maŋyzdy sanksiialardyŋ küşın joiǧan edı.
Aq üi, sondai-aq Resei men Qytaidyŋ Vaşingtondaǧy elşılıkterı äzırge būqaralyq aqparat qūraldarynyŋ tüsınıkteme beru turaly saualdaryna jauap bergen joq.
