Flydubai اۋە كومپانياسىنىڭ ۇشاعىندا بولعان وقيعادان امان قالعان كاپيتان جاعدايدىڭ قالاي وربىگەنىن باياندادى، دەپ حابارلايدى «ادىرنا» ءتىلشىسى ربك-عا سىلتەمە جاساپ.
باسىلىمنىڭ مالىمەتىنشە، سميت ماچچحار The National گازەتىنە بەرگەن سۇحباتىندا ەكىنشى ۇشقىشتىڭ وزىنە بىرنەشە رەت بالتامەن سوققى جاساپ، ۇشاقتى تومەن قاراي باعىتتاعانىن ايتقان.
ماچچحاردىڭ سوزىنشە، ەكىنشى ۇشقىش ەكى ساعات بويى ونىڭ جانىندا وتىرىپ، ەشقانداي كۇدىك تۋدىرماعان. الايدا كەنەتتەن وعان شابۋىل جاساي باستاعان. سول ساتتە ۇشاق ءبىر مينۋتقا جەتپەيتىن ۋاقىت ىشىندە 17 مىڭ فۋت بيىكتىگىن جوعالتقان.
«قولىمنان كەلگەنشە سوققىلاردان قورعانۋعا تىرىستىم. ارىپتەستەرىمدى كومەككە شاقىرىپ ايقايلادىم. اقىرى ەتپەتىمنەن قۇلادىم»، – دەدى ماچچحار.
كاپيتاننىڭ ايتۋىنشا، العاشىندا باسىنا تيگەن سوققىنى ۇشاق جابدىعىنىڭ ءبىر بولىگى قۇلاپ كەتكەننەن بولدى دەپ ويلاعان. الايدا ارتىنشا سوققىلار جالعاسا بەرگەن.
«العاش رەت سوققى تيگەندە ۇشاقتىڭ قۇرىلىمىندا اقاۋ بولىپ، ءبىر بولشەك باسىما قۇلاعان شىعار دەپ ويلادىم. رولگە قۇلاپ كەتە جازدادىم. بىرنەشە سەكۋندتان كەيىن سوققىلار جالعاسقاندا، ماعان باسقا ادامنىڭ – ءوزىم ەكيپاج مۇشەسى دەپ ساناعان ادامنىڭ شابۋىل جاساپ جاتقانىن ءتۇسىندىم»، – دەدى ول.
ماچچحار الدىمەن قاۋىپسىزدىك بەلدىگىن شەشىپ، باسىنا باعىتتالعان سوققىلاردان قورعانۋعا تىرىسقانىن جەتكىزدى.
«العاشقى سوققىلاردان كەيىن كورۋ قابىلەتىم قاتتى ناشارلاپ، اينالامدى انىق كورە الماي قالدىم. تەك زاتتاردىڭ سۇلباسىن عانا اجىراتا الدىم»، – دەدى كاپيتان.
ول وقيعالاردىڭ ناقتى رەتىن جانە ولاردىڭ اراسىندا قانشا ۋاقىت وتكەنىن انىق ەسىنە تۇسىرە المايتىنىن ايتتى. سوعان قاراماستان، بىرنەشە رەت ارەكەتتەنگەننەن كەيىن، كوپ قان جوعالتىپ، ەسىنەن تانىپ قالا جازداسا دا، ۇشقىشتار كابيناسىنىڭ ەسىگىن اشقان.
كاپيتاننىڭ سوزىنشە، شابۋىل جاساعان ۇشقىش ۇشاقتى تومەن قاراي باعىتتاعان كەزدە ەسىن جيعان. وسى ۋاقىتتا ەكيپاج مۇشەلەرى مەن جولاۋشىلار كابينانىڭ ارعى جاعىنان ەسىكتى ۇرا باستاعان.
«ەڭ قورقىنىشتىسى – قوزعالتقىشتاردىڭ قۋاتى ازايا باستاعانىن سەزگەنىم. قوزعالتقىشتاردىڭ دىبىسى دا وزگەردى. تولىق قۋاتپەن جۇمىس ىستەپ تۇرعان كەزدەگى ۇننەن ۇشۋدىڭ وسى كەزەڭىندە مۇلدە كۇتپەيتىن دەڭگەيگە دەيىن باسەڭدەدى. سونداي-اق ۇشاقتىڭ كۇرت تومەن قاراي قۇلديلاعانىن سەزدىم. سول ساتتە امان قالمايتىنىمدى ءتۇسىندىم. ەسىكتى ىزدەۋدى توقتاتپادىم. وعان جەتۋگە تىرىستىم. ەسىكتى يتەردىم… ودان كەيىن ەسىمدە قالعانى – ەتپەتىمنەن جاتقانىم جانە، قۇدايعا شۇكىر، كابينا ەسىگىنىڭ اشىق بولعانى»، – دەپ ەسكە الدى ماچچحار.
وقيعا كەزىندە جولاۋشىلاردىڭ اراسىندا بولعان ءارى زارداپ شەككەن ۇشقىشقا كومەك كورسەتكەن ءتىس دارىگەرى شوتا مۋساەۆتىڭ ايتۋىنشا، ماچچحاردىڭ باسى مەن سول قولىنان قاتتى قان كەتكەن.
ەسكە سالايىق، 30 قىركۇيەكتە باق-تا Boeing 737 جولاۋشىلار ۇشاعى ساۋد ارابياسىنىڭ ۇستىمەن بۇرىلىپ ۇشىپ بارا جاتقاندا توتەنشە جاعداي تۋرالى بەلگى بەرگەنى جونىندە اقپارات تاراعان ەدى. ۇشاق 7500 كودىن جىبەرگەن. بۇل كود اۋە كەمەسىنىڭ باسىپ الىنعانىن نەمەسە وعان زاڭسىز ارالاسۋ بولعانىن بىلدىرەدى. وسىدان كەيىن يزرايل اسكەري-اۋە كۇشتەرىنىڭ جويعىش ۇشاقتارى اۋە لاينەرىنە قاراي كوتەرىلگەنى حابارلاندى.
كەيىن ۇشاقتىڭ ساۋد ارابياسىنا قونعانى بەلگىلى بولدى. باق مالىمەتىنشە، دۋباي – تەل-اۆيۆ باعىتىنداعى رەيس كەزىندە ۇشقىشتار اراسىندا توبەلەس بولعان. وسىدان كەيىن ۇشاقتىڭ ىشىنەن تۇسىرىلگەن العاشقى فوتو مەن بەينەجازبالار جاريالاندى. كەيىن زارداپ شەككەن ۇشقىشتىڭ ءۇندىستان ازاماتى سميت ماچچحار ەكەنى انىقتالدى.
ءيزرايلدىڭ قورعانىس ءمينيسترى يسراەل كاتس ۇشاق بورتىندا بولعان جاعدايدى تەراكت جاساۋ ارەكەتى دەپ اتادى. سونداي-اق تەراكت جاساۋعا ارەكەتتەندى دەگەن كۇدىككە ىلىنگەن ۇشقىشتىڭ اتى-ءجونى مەن ازاماتتىعى بەلگىلى بولدى. بىرىككەن اراب امىرلىكتەرىنىڭ باس پروكۋراتۋراسى دا بۇل وقيعانى تەراكت جاساۋ ارەكەتى دەپ تانىدى. بۇدان بولەك، يزرايل تاراپى Flydubai ۇشاعىنىڭ ۇشقىشى لاينەردى تەل-اۆيۆ اۋەجايىندا اپاتقا ۇشىراتۋدى كوزدەگەنىن مالىمدەدى.
