فوتو: ۆيدەودان الىنعان
جەتىسۋ وبلىسىندا شاعىن اۆتوبۋس پەن جۇك كولىگىنىڭ قاتىسۋىمەن جول-كولىك وقيعاسى بولىپ، ەكى ادام كوز جۇمدى. تاعى ون جولاۋشى ءتۇرلى جاراقات الىپ، مەديتسينالىق مەكەمەگە جەتكىزىلدى.الەۋمەتتىك جەلىلەردە اپات ورنىنان تۇسىرىلگەن ۆيدەو تارادى، دەپ حابارلايدى "ادىرنا".
وقيعا 17 قازاندا كەربۇلاق اۋدانىنداعى ارقارلى اسۋى ماڭىندا بولعان. الدىن الا مالىمەت بويىنشا، Mercedes-Benz Sprinter شاعىن اۆتوبۋسى مەن كاماز جۇك كولىگى سوقتىعىسقان.
جەتىسۋ وبلىستىق پوليتسيا دەپارتامەنتىنىڭ مالىمەتىنشە، جول اپاتى الماتى–وسكەمەن تاسجولىنىڭ 143-شاقىرىمىندا تىركەلگەن. وڭتۇستىك باعىتتا قوزعالىپ كەلە جاتقان شاعىن اۆتوبۋس جۇرگىزۋشىسى الدىنداعى باعىتتاس كاماز كولىگىنىڭ تىركەمەسىنە سوعىلعان.
اپات سالدارىنان ەكى ادام قازا تاۋىپ، ون ادام اۋرۋحاناعا جەتكىزىلدى. شاعىن اۆتوبۋس جۇرگىزۋشىسى ۇستالىپ، ۋاقىتشا ۇستاۋ يزولياتورىنا قامالدى.
اتالعان دەرەك بويىنشا سوتقا دەيىنگى تەرگەۋ باستالىپ، وقيعانىڭ ءمان-جايىن انىقتاۋ ءۇشىن قاجەتتى ساراپتامالار تاعايىندالدى.
پوليتسيا وكىلدەرى جۇرگىزۋشىلەردى جول قوزعالىسى ەرەجەلەرىن ساقتاۋعا، جىلدامدىقتى جول جاعدايىنا ساي تاڭداۋعا، كولىكتەر اراسىنداعى قاۋىپسىز اراقاشىقتىقتى ۇستانۋعا جانە رولدە مۇقيات بولۋعا شاقىردى.
