تاجىكستاننىڭ دۋشانبە – كۇلاب – حوروگ تاسجولىندا بولعان ءىرى جول-كولىك وقيعاسى سالدارىنان 11 ادام قازا تاپتى. بۇل تۋرالى ەلدىڭ ىشكى ىستەر مينيسترلىگى مالىمدەدى، دەپ حابارلايدى "ادىرنا".
ۆەدومستۆونىڭ مالىمەتىنشە، قايعىلى وقيعا 2 شىلدە كۇنى تاڭعى ساعات 06:30 شاماسىندا ۆاحدات قالاسىنا قاراستى ەلوك اۋىلى ماڭىنداعى جولدىڭ 32-شاقىرىمىندا بولعان.
الدىن الا مالىمەت بويىنشا، جۇك كولىگى ەكى جەڭىل اۆتوكولىكپەن سوقتىعىسقان. اپات سالدارىنان جۇك كولىگىنىڭ جۇرگىزۋشىسى، Toyota Prado كولىگىنىڭ جۇرگىزۋشىسى جانە جەڭىل كولىكتەردە وتىرعان توعىز جولاۋشى وقيعا ورنىندا كوز جۇمعان.
قازىرگى ۋاقىتتا قۇقىق قورعاۋ ورگاندارى قازا بولعان جولاۋشىلاردىڭ جەكە باسىن انىقتاۋ جۇمىستارىن جۇرگىزىپ جاتىر. وقيعانىڭ ءمان-جايى مەن جول اپاتىنىڭ سەبەپتەرى انىقتالۋدا.
ۇقساس جاڭالىقتار
