فوتو: Report
تۇركيا بيلىگى يزرايل پرەزيدەنتى يتسحاك گەرتسوگتىڭ ازەربايجان استاناسى باكۋدە وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) VII سامميتىنە AZAL اۋە كومپانياسىنىڭ تۇراقتى كوممەرتسيالىق رەيسىمەن ۇشىپ بارعانىنان حابارسىز بولعان. سەبەبى حالىقارالىق اۆياتسيا ەرەجەلەرىندە ترانزيتتىك ەلدەرگە ۇشاق جولاۋشىلارى تۋرالى مالىمەت بەرۋ قاراستىرىلماعان، دەپ حابارلايدى “ادىرنا”.
Report اگەنتتىگىنىڭ حابارلاۋىنشا، بۇل تۋرال تۇرىكتىڭ Haber Global تەلەارناسىنىڭ ارنايى سيۋجەتىندە ايتىلعان.
تۇركيانىڭ رەسمي وكىلدەرى تەلەارناعا يزرايل پرەزيدەنتىنىڭ ازاماتتىق اۋە كەمەسىنىڭ بورتىندا بولعانى تۋرالى حاباردار ەتىلمەگەنىن راستاعان.
سيۋجەتتە تۇراقتى حالىقارالىق رەيستەر كەزىندە ترانزيتتىك مەملەكەتتەردىڭ ديسپەتچەرلىك قىزمەتتەرىنە ۇشۋ جوسپارى، اۋە كەمەسىنىڭ ءتۇرى، باعىتى جانە نەگىزگى تەحنيكالىق دەرەكتەرى بەرىلەتىنى ايتىلعان. الايدا جولاۋشىلاردىڭ جەكە باسى مەن ولاردىڭ اراسىندا جوعارى لاۋازىمدى تۇلعالاردىڭ بار-جوعى تۋرالى اقپارات ۇسىنىلمايدى.
«بۇل تالاپتار حالىقارالىق ازاماتتىق اۆياتسيا ۇيىمىنىڭ (ICAO) ەرەجەلەرى مەن حالىقارالىق اەروناۆيگاتسيانىڭ ستاندارتتى راسىمدەرىندە بەكىتىلگەن»، – دەپ اتاپ ءوتتى تەلەارنا.
Haber Global مالىمەتىنشە، تۇركيادا قولدانىستاعى تىيىم يزرايلگە تيەسىلى ۇكىمەتتىك جانە مەملەكەتتىك اۋە كەمەلەرىنە، سونىڭ ىشىندە «سيون قاناتى» دەپ اتالاتىن رەسمي ۇشاققا قاتىستى.
ال AZAL ۇشاقتارى تۇراقتى كوممەرتسيالىق رەيستەر ورىندايتىندىقتان، بورتىندا يزرايل پرەزيدەنتى بولعان اۋە كەمەسى جوعارى لاۋازىمدى تۇلعانى ترانزيتپەن وتكىزۋ ءۇشىن ارنايى رۇقسات الماي-اق تۇركيانىڭ اۋە كەڭىستىگىن پايدالانعان.
ايتا كەتەيىك، اوسشك ءسامميتى باكۋدە ءوتىپ، وعان مۇشە 29 ەلدى قوسا العاندا، 50-دەن استام دەلەگاتسيا قاتىستى. ولاردىڭ قاتارىندا باقىلاۋشى مەملەكەتتەر، سەرىكتەستەر جانە حالىقارالىق ۇيىمداردىڭ وكىلدەرى بولدى.
سامميت جۇمىسىنا قازاقستان، وزبەكستان، قىرعىزستان، لاوس، يزرايل، كامبودجا جانە باسقا دا ەلدەردىڭ مەملەكەت جانە ۇكىمەت باسشىلارى، سونداي-اق تۇركيا، رەسەي، قىتاي جانە وزگە مەملەكەتتەردىڭ سىرتقى ىستەر مينيسترلەرى قاتىستى.
ەسكە سالساق، 11 قازاندا استاناعا بەلگيا كورولى فيليپپ پەن پاتشايىم ماتيلدا Air Astana ۇشاعىمەن، ادەتتەگى رەيسپەن كەلگەن بولاتىن.
