ءيزرايلدىڭ ۇلتتىق قاۋىپسىزدىك ءمينيسترى يتامار بەن-گۆير جەكسەنبى كۇنى يەرۋساليمدەگى ءال-اقسا مەشىتىنە بارىپ، عيبادات ەتتى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
بۇرىن مۇسىلمان بيلىگىمەن جاسالعان بەيرەسمي كەلىسىمگە سايكەس، ءال-اقسا كەشەنى يوردانيالىق ءدىني قوردىڭ باسقارۋىندا جانە ەۆرەيلەر ول جەرگە كەلۋگە قۇقىلى. الايدا مەشىتتە ناماز وقۋعا تىيىم سالىنعان.
«عيباداتحانا تاۋىنىڭ اكىمشىلىگى» دەپ اتالاتىن شاعىن ەۆرەي ۇيىمى جاريالاعان ۆيدەودا بەن-گۆيردىڭ ءبىر توپ اداممەن كەشەن اۋماعىندا سەرۋەندەپ جۇرگەنى كورىنەدى. باسقا ۆيدەولاردا ونىڭ ناماز وقىپ جاتقانى بايقالادى.
ءال-اقسا مەشىتى — مۇسىلماندار ءۇشىن قاعبا (حارام مەشىتى) مەن ماديناداعى پايعامبار مەشىتىنەن كەيىنگى ءۇشىنشى قاسيەتتى ورىن، ال عيباداتحانا تاۋى — يۋدايزمدەگى ەڭ قاسيەتتى ورىن.
يزرايل 1967 جىلعى تاياۋ شىعىس سوعىسى كەزىندە ءال-اقسا كەشەنىن يوردانيادان تارتىپ العان. سول كەزدە يوردانيا بۇل جەردىڭ تاريحي قورعاۋشىسى رەتىندەگى ءرولىن جالعاستىرۋ قۇقىعىن ساقتاپ قالعان، ال يزرايل قاۋىپسىزدىك پەن كىرۋ-شىعۋ ماسەلەسىن ءوز باقىلاۋىنا العان.
پالەستينالىقتاردىڭ ايتۋىنشا، سوڭعى جىلدارى كەشەنگە كەلگەن ەۆرەيلەر وندا ءجيى ناماز وقيدى، ال يزرايل پوليتسياسى ولارعا كەدەرگى كەلتىرمەيدى.
ايتا كەتەيىك، يزرايل كەشەن اۋماعىندا مۇسىلمان ەمەستەردىڭ ناماز وقۋىنا شەكتەۋ قوياتىن ەرەجەلەردى مويىندايدى. بەن-گۆيردىڭ ساپارىنان كەيىن پرەمەر-مينيستر بينيامين نەتانياحۋ ءيزرايلدىڭ ءال-اقسا كەشەنىندەگى ستاتۋس-كۆونى ساقتاۋ ساياساتى «وزگەرمەگەنىن جانە وزگەرمەيتىنىن» مالىمدەدى.
ۇلتشىل كوزقاراستاعى بەن-گۆير ۇلتتىق قاۋىپسىزدىك ءمينيسترى رەتىندە پوليتسيا قىزمەتىن باقىلايدى. ول بۇل جەرگە بۇعان دەيىن دە بارعان. Times of Israel باسىلىمىنىڭ جازۋىنشا، بۇل جولى ول العاش رەت عيباداتحانا تاۋىندا اشىق تۇردە قۇلشىلىق جاساعان. ساپار كەزىندە ونى پوليتسيا قىزمەتكەرلەرى الىپ جۇرگەن. ءوز مالىمدەمەسىندە بەن-گۆير ءيزرايلدىڭ گازاداعى حاماس-پەن سوعىستا جەڭىسكە جەتۋىن جانە سودىرلاردىڭ قولىندا تۇرعان يزرايلدىك تۇتقىنداردىڭ ەلگە ورالۋىن تىلەپ، عيبادات ەتكەنىن جەتكىزدى.
