استانادا مەرەيتويلىق X Astana Media Week 2026 اپتالىعىنىڭ اشىلۋى ءوتتى. پلەنارلىق سەسسيادا قازاقستان رەسپۋبليكاسى مادەنيەت جانە اقپارات ءبىرىنشى ۆيتسە-ءمينيسترى قانات ىسقاقوۆ وتاندىق مەدياسالانىڭ سوڭعى ون جىلداعى نەگىزگى وزگەرىستەرىنە، جاساندى ينتەللەكتكە بايلانىستى سىن-قاتەرلەرگە جانە باق پەن قوعام اراسىنداعى سەنىمنىڭ جاڭا ارحيتەكتۋراسىن قالىپتاستىرۋ باسىمدىقتارىنا توقتالدى.
قانات ىسقاقوۆ ءوز سوزىندە قازاقستاننىڭ ون جىل ىشىندە اقپارات تاراتۋدىڭ ءداستۇرلى مودەلىنەن كوپارنالى تسيفرلىق مەدياورتاعا كوشكەنىن اتاپ ءوتتى. ەگەر 2017 جىلى ەلدە شامامەن 2,9 مىڭ بۇقارالىق اقپارات قۇرالى تىركەلگەن بولسا، بۇگىندە ولاردىڭ سانى 5,4 مىڭنان اسادى. ال ينتەرنەتكە قولجەتىمدىلىگى بار حالىقتىڭ ۇلەسى 73%-دان 93,4%-عا ءوستى.
اۋديتوريانىڭ تالعامى دا ايتارلىقتاي وزگەردى. قازىر قازاقستاندىقتاردىڭ 39,1%-ى جاڭالىقتاردى نەگىزىنەن الەۋمەتتىك جەلىلەر مەن مەسسەندجەرلەردەن الادى. Telegram, Instagram, YouTube جانە TikTok اقپارات تاراتۋدىڭ تولىققاندى ارنالارىنا اينالىپ، بلوگەرلەر مەن تسيفرلىق پلاتفورمالار ءداستۇرلى رەداكتسيالارمەن بەلسەندى باسەكەلەسىپ جاتىر.
ءبىرىنشى ۆيتسە-ءمينيستردىڭ ايتۋىنشا، مەديانارىقتىڭ كەلەسى وزگەرىس كەزەڭى جاساندى ينتەللەكتتىڭ دامۋىمەن تىكەلەي بايلانىستى. نەيروجەلىلەر قازىردىڭ وزىندە اقپارات ىزدەۋ مەن وڭدەۋگە، ءماتىن، سۋرەت جانە بەينەماتەريالدار جاساۋعا قولدانىلىپ كەلەدى. سونىمەن قاتار جالعان اقپارات پەن ديپفەيكتەردىڭ تارالۋى، جەكە دەرەكتەردىڭ قۇپيالىلىعى بۇزىلۋى سياقتى قاۋىپتەر دە ارتىپ وتىر.
قانات ىسقاقوۆ ءۇش نەگىزگى قاعيداتقا سۇيەنەتىن سەنىمنىڭ جاڭا ارحيتەكتۋراسىن قالىپتاستىرۋ قاجەتتىگىنە ەرەكشە نازار اۋداردى. ولار – كاسىبي جۋرناليستيكانى نىعايتۋ، جاريالاناتىن اقپارات ءۇشىن ادامنىڭ جاۋاپكەرشىلىگى جانە تەحنولوگيالاردى قاۋىپسىز پايدالانۋ.
«الگوريتم ءماتىن جازا الادى، بىراق ءسوز ءۇشىن جاۋاپ بەرە المايدى. جاۋاپكەرشىلىك ءاردايىم جۋرناليست پەن رەداكتوردىڭ موينىندا قالادى. سوندىقتان مەدياقاۋىمداستىقپەن بىرگە رەداكتسيالاردا جاساندى ينتەللەكتتى جاۋاپكەرشىلىكپەن پايدالانۋدىڭ ورتاق قاعيداتتارىن ازىرلەۋدى ۇسىنامىز. ەڭ الدىمەن، بۇل – اۋديتورياعا اشىقتىق تانىتۋ جانە جاساندى ينتەللەكتتىڭ قاتىسۋىمەن جاسالعان دۇنيەنىڭ ءبارىن ادامنىڭ مىندەتتى تۇردە تەكسەرۋى»، – دەپ اتاپ ءوتتى قانات ىسقاقوۆ.
وسى ۇستانىم اياسىندا مادەنيەت جانە اقپارات مينيسترلىگى گرانتتىق جۇيە ارقىلى ساپالى مەدياكونتەنت ءوندىرىسىن قولداۋدى جالعاستىرادى. دەرەكتەر جۋرناليستيكاسىن، فاكتچەكينگتى دامىتۋعا جانە مەملەكەتتىك تىلدەگى ماتەريالداردى دايىنداۋعا ەرەكشە كوڭىل بولىنەدى.
بۇدان بولەك، سينتەتيكالىق كونتەنتتى تاڭبالاۋ تەتىكتەرىن ەنگىزۋ، ديپفەيكتەردى انىقتاۋ قۇرالدارىن جەتىلدىرۋ جانە حالىقتىڭ مەدياساۋاتىن ارتتىرۋ قاجەتتىگى ايتىلدى. جۋرناليستەردىڭ، سونىڭ ىشىندە وڭىرلەردەگى مامانداردىڭ جاساندى ينتەللەكت سالاسىنداعى قۇزىرەتىن دامىتۋ جەكە باسىمدىققا اينالادى.
«تەحنولوگيالار بىزگە نەعۇرلىم كوپ مۇمكىندىك بەرسە، ولاردى پايدالانۋداعى جاۋاپكەرشىلىكتىڭ سالماعى دا سوعۇرلىم ارتادى»، – دەدى ءبىرىنشى ۆيتسە-مينيستر.
سالانىڭ دامۋ كەلەشەگى تۋرالى ايتقان قانات ىسقاقوۆ ءتورت ايقىنداۋشى فاكتوردى اتاپ ءوتتى. ولار – شىنايى اقپاراتتىڭ قۇندىلىعىن ارتتىرۋ، جي كومەكشىلەرى ارقىلى جاڭالىقتاردى تۇتىنۋ تاسىلدەرىنىڭ وزگەرۋى، جۋرناليستەردىڭ تەرەڭىرەك تالداۋعا كوشۋى جانە ساپالى قازاقتىلدى كونتەنتتى دامىتۋ.
ءسوزىنىڭ سوڭىندا ءبىرىنشى ۆيتسە-مينيستر تەحنولوگيالىق وزگەرىستەردىڭ جىلدامدىعىنا قاراماستان، قوعام سەنىمىنىڭ نەگىزى ءجۋرناليستىڭ كاسىبيلىگى، ادالدىعى مەن جاۋاپكەرشىلىگى بولىپ قالا بەرەتىنىن اتاپ ءوتتى.
Astana Media Week 2026 استانادا 14–16 قازان ارالىعىندا وتەدى. ءىس-شارا اقپارات سالاسىنىڭ بولاشاعىن تالقىلاۋ ءۇشىن مەملەكەتتىك ورگانداردىڭ، مەدياقاۋىمداستىقتىڭ، تسيفرلىق پلاتفورمالاردىڭ وكىلدەرى مەن حالىقارالىق ساراپشىلاردى بىرىكتىرەدى.
