13 قازاندا رەسەي فەدەرالدىق قاۋىپسىزدىك قىزمەتى (فقق) ساحالين وبلىسىندا جاپوندىق «حوككايدو سيمبۋن» گازەتىنىڭ ءتىلشىسىن ۇستاعانىن ايتتى، دەپ حابارلايدى «ادىرنا» ءتىلشىسى.
ارنايى قىزمەتتىڭ قوعاممەن بايلانىس ورتالىعىنىڭ مالىمەتىنشە، جۋرناليست رەسەيدىڭ قورعانىس قابىلەتىنە قاتىستى اقپارات جيناعان جانە وعان تىڭشىلىق جاسادى دەگەن ايىپ تاعىلعان.
فقق جاريالاعان بەينەجازبادا بەتپەردە كيگەن قىزمەتكەرلەردىڭ قوناقۇي بولمەسىنە باسىپ كىرىپ، ەر ادامدى ەدەنگە جاتقىزىپ، قولىنا كىسەن سالعانى كورسەتىلگەن.
ۇستالعان جۋرناليست ماسكەۋگە جەتكىزىلگەن. ماسكەۋدەگى لەفورتوۆو سوتى ونى كەمىندە ەكى ايعا قاماۋعا الۋعا سانكتسيا بەرگەن. كۇدىكتىنىڭ ناقتى قاي كۇنى ۇستالعانى جانە سوت وتىرىسىنىڭ قاشان وتكەنى بەلگىسىز. تاعىلعان ايىپتار بويىنشا 20 جىلعا دەيىن باس بوستاندىعىنان ايىرۋ جازاسى قاراستىرىلعان.
ارنايى قىزمەت قاماۋعا الىنعان ادامنىڭ جەكە باسىن جاريالامادى. الايدا «ينتەرفاكس» اگەنتتىگى ونىڭ ەسىمى يماي يۋكي ەكەنىن حابارلادى. ول ماسكەۋدەگى «لەفورتوۆو» تەرگەۋ يزولياتورىندا قاماۋدا بولادى دەپ كۇتىلۋدە.
فقق تاراتقان بەينەجازبادا ارنايى قىزمەت وكىلى جاپوندىق جۋرناليست ءوز ەلىنىڭ بارلاۋ قىزمەتىنىڭ تاپسىرماسىن ورىنداعانىن ايتادى. مالىمدەمەگە سايكەس، ول كۋريل ارالدارىنىڭ تۇرعىندارى اراسىنان ۋكرايناعا قارسى سوعىسقا جۇمىلدىرىلعاندار مەن ەرىكتىلەردىڭ سانى تۋرالى مالىمەتتەر جيناپ، ساقتاعان.
«حوككايدو سيمبۋن» گازەتىنىڭ ءتىلشىسىنىڭ ۇستالۋىنا قاتىستى توكيونىڭ رەاكتسياسى ازىرگە جاريالانعان جوق.
سوڭعى جىلدارى رەسەي بيلىگى «دوستىق پەيىل تانىتپايتىن» ەلدەردىڭ بىرنەشە ازاماتىن ۇستاپ، ولاردى باتىس ارنايى قىزمەتتەرىنىڭ مۇددەسىنە جۇمىس ىستەدى دەپ ايىپتاعان.
ماسكەۋ مەن توكيو تىنىق مۇحيتىنداعى ارالدار توبىنىڭ مارتەبەسىنە قاتىستى اۋماقتىق داۋدى ونداعان جىل بويى جالعاستىرىپ كەلەدى. ارالدار جاپونيانىڭ سولتۇستىك-شىعىس جاعالاۋىنا جاقىن، ال رەسەيدىڭ ساحالين ارالىنىڭ وڭتۇستىك-باتىسىندا ورنالاسقان.
جاپونيادا «سولتۇستىك اۋماقتار» دەپ اتالاتىن كۋريل ارالدارى ەكىنشى دۇنيەجۇزىلىك سوعىس اياقتالعاننان بەرى رەسەيدىڭ باقىلاۋىندا. سول كەزدە بۇل ارالداردى كەڭەس وداعى باسىپ العان.
