13 qazanda Resei Federaldyq qauıpsızdık qyzmetı (FQQ) Sahalin oblysynda japondyq «Hokkaido Simbun» gazetınıŋ tılşısın ūstaǧanyn aitty, dep habarlaidy «Adyrna» tılşısı.
Arnaiy qyzmettıŋ Qoǧammen bailanys ortalyǧynyŋ mälımetınşe, jurnalist Reseidıŋ qorǧanys qabıletıne qatysty aqparat jinaǧan jäne oǧan tyŋşylyq jasady degen aiyp taǧylǧan.
FQQ jariialaǧan beinejazbada betperde kigen qyzmetkerlerdıŋ qonaqüi bölmesıne basyp kırıp, er adamdy edenge jatqyzyp, qolyna kısen salǧany körsetılgen.
Ūstalǧan jurnalist Mäskeuge jetkızılgen. Mäskeudegı Lefortovo soty ony kemınde ekı aiǧa qamauǧa aluǧa sanksiia bergen. Küdıktınıŋ naqty qai künı ūstalǧany jäne sot otyrysynyŋ qaşan ötkenı belgısız. Taǧylǧan aiyptar boiynşa 20 jylǧa deiın bas bostandyǧynan aiyru jazasy qarastyrylǧan.
Arnaiy qyzmet qamauǧa alynǧan adamnyŋ jeke basyn jariialamady. Alaida «İnterfaks» agenttıgı onyŋ esımı İmai Iýki ekenın habarlady. Ol Mäskeudegı «Lefortovo» tergeu izoliatorynda qamauda bolady dep kütılude.
FQQ taratqan beinejazbada arnaiy qyzmet ökılı japondyq jurnalist öz elınıŋ barlau qyzmetınıŋ tapsyrmasyn oryndaǧanyn aitady. Mälımdemege säikes, ol Kuril araldarynyŋ tūrǧyndary arasynan Ukrainaǧa qarsy soǧysqa jūmyldyrylǧandar men erıktılerdıŋ sany turaly mälımetter jinap, saqtaǧan.
«Hokkaido Simbun» gazetınıŋ tılşısınıŋ ūstaluyna qatysty Tokionyŋ reaksiiasy äzırge jariialanǧan joq.
Soŋǧy jyldary Resei bilıgı «dostyq peiıl tanytpaityn» elderdıŋ bırneşe azamatyn ūstap, olardy Batys arnaiy qyzmetterınıŋ müddesıne jūmys ıstedı dep aiyptaǧan.
Mäskeu men Tokio Tynyq mūhityndaǧy araldar tobynyŋ märtebesıne qatysty aumaqtyq daudy ondaǧan jyl boiy jalǧastyryp keledı. Araldar Japoniianyŋ soltüstık-şyǧys jaǧalauyna jaqyn, al Reseidıŋ Sahalin aralynyŋ oŋtüstık-batysynda ornalasqan.
Japoniiada «Soltüstık aumaqtar» dep atalatyn Kuril araldary Ekınşı düniejüzılık soǧys aiaqtalǧannan berı Reseidıŋ baqylauynda. Sol kezde būl araldardy Keŋes Odaǧy basyp alǧan.
