Bügın jazuşy Rollan Seisenbaev 80 jasqa toldy. Qalamgerdıŋ özındık közqarasy, öz paiymy erekşe. Şyǧarmalary keŋ, auqymdy, san-salaly.
Rollan Seisenbaev 1946 jyly 11 qazanda Semei qalasynda düniege kelgen. Semei tehnologiialyq institutynyŋ tülegı keiın Mäskeudegı Gorkii atyndaǧy Ädebiet instituty janyndaǧy Joǧary ädebi kurstaryn ötkerdı.
Oblystyq gazette, teledidarda jäne oblystyq komsomol komitetınde qyzmet atqarǧan, qalalyq atqaru komitetı töraǧasynyŋ orynbasary bolǧan.
Ädebiette öz jolyn erte aiqyndaǧan qalamgerdıŋ alǧaşqy hikaiaty 1975 jyly jaryq kördı. Sodan berı «Aŋsau», «Özımdı ızdep jürmın», «Saǧynyp jetken jaz edı» povesterı, «Ömır sürgıŋ kelse eger...», «Tau basynda tüiısken jol», «Begstvo», «Eşqaida bastamaityn baspaldaq», «Mertvye brodiat v peskah» jäne basqa da romandardyŋ avtory. Onyŋ keibır şyǧarmalarynda Semei poligony men Aral teŋızınıŋ zardaby arqau bolǧan. Jazuşynyŋ pesalary da sahnalarda qoiylyp keledı.
Jazuşynyŋ ärnärsege öz közqarasy, öz paiymy bar. Bolyp jatqan oqiǧalardy özınşe qabyldap, özınşe oi qorytady. Şyǧarmalary keŋ, auqymdy, ne jazsa da jahandy tebırentken saualdarǧa jauap ızdeidı.
Rollan Seisenbaev 1975-1991 jyldary Mäskeude KSRO Jazuşylar odaǧynda qazaq ädebietı boiynşa jauapty hatşy qyzmetın atqardy. Osy jyldary ol qazaq jazuşylary şyǧarmalarynyŋ özge tılge köptep audaryluyna ūiytqy boldy.
1992 jyly «Iаdrolyq synaqtardyŋ qūrbany — balalar» qoryn qūrdy. Semei poligony zardabyn öz basynan ötkergen jazuşy seksenınşı jyldardyŋ soŋynda "Dünie tastalqan bolǧan kün" romanyn jazdy.
1993 jyly «Qazaqstan» teleradiokorporasiiasynda «Abai älemı» baǧdarlamasyn aşty. 1994-1996 jyldary Qazaqstannyŋ sol kezdegı prezidentınıŋ keŋesşısı boldy. 1995 jyly Londonda täuelsız «Abai üiı» mädeni ortalyǧyn aşty. 2000 jyly Semeide «Halyqaralyq Abai klubyn» jäne «Amanat» jurnalyn qūrdy. 2012 jyly äl-Farabi atyndaǧy Qazaq ūlttyq universitetı janyndaǧy Älem halyqtary ädebietı institutyn jäne «Halyqaralyq Abai klubyn» basqardy.
2022 jyly Radius jäne Pegasus Brucke öner ortalyqtary taǧaiyndaǧan «Älemnıŋ altyn jazuşysy» syilyǧyna, 2023 jyly Taras Şevchenko atyndaǧy halyqaralyq syilyqqa ie boldy.
