اقش پرەزيدەنتى دونالد ترامپ رەسەي باسشىسى ۆلاديمير پۋتينمەن تەلەفون ارقىلى سويلەسكەننەن كەيىن رەسەيدەن ديزەل وتىنىن جەتكىزۋ تۋرالى كەلىسىمگە كەلگەنىن مالىمدەدى. ونىڭ ايتۋىنشا، رەسەي اقش پەن الەمدىك نارىقتارعا جالپى 3 ميلليون توننا ديزەل وتىنىن جەتكىزۋى مۇمكىن. ترامپ بۇل قادام جانارماي باعاسىن تومەندەتۋگە ىقپال ەتەتىنىن ايتتى. بۇل تۋرالى ۆۆس جازدى, دەپ حابارلايدى “ادىرنا”.
«مەن رەسەي پرەزيدەنتى ۆلاديمير پۋتينمەن اسا تابىستى كەلىسسوز جۇرگىزدىم. ونىڭ بارىسىندا رەسەي ديزەل وتىنىن اقش جانە الەمدىك نارىقتارعا دەرەۋ 300 مىڭ توننادان استام كولەمدە جەتكىزۋگە، قاراشا ايىندا تاعى 500 مىڭ توننا، ال ودان كەيىن بىردەن 1 ميلليون توننا جەتكىزۋگە كەلىستى»، – دەپ جازدى ترامپ Truth Social الەۋمەتتىك جەلىسىندە.
اق ءۇي باسشىسىنىڭ ايتۋىنشا، رەسەي مۇناي وڭدەۋ زاۋىتتارىنىڭ وندىرىستىك مۇمكىندىكتەرىن ەسكەرە وتىرىپ، جالپى كولەمى 3 ميلليون توننا ديزەل وتىنىن جەتكىزەدى. ترامپتىڭ پايىمداۋىنشا، وسىنىڭ ارقاسىندا امەريكالىقتار مەن جالپى الەم ءۇشىن ديزەل وتىنىنىڭ باعاسى «جىلدام ءارى رەكوردتىق قارقىنمەن تومەندەي» باستايدى.
وسى ۋاقىتتا اقش قارجى مينيسترلىگى رەسەي ديزەل وتىنىن امەريكالىق نارىققا جەتكىزۋگە رۇقسات بەرەتىن ۋاقىتشا ليتسەنزيانى 2027 جىلعى 7 ساۋىرگە دەيىن ۇزارتقانى بەلگىلى بولدى.
رەسەي پرەزيدەنتىنىڭ كومەكشىسى يۋري ۋشاكوۆ ەكى ەل باسشىلارى ۋكرايناداعى جاعدايدى، يران توڭىرەگىندەگى احۋالدى جانە ەكىجاقتى قارىم-قاتىناستاردى تالقىلاعانىن حابارلادى. ال رەسەي پرەمەر-ءمينيسترىنىڭ ورىنباسارى الەكساندر نوۆاك ديزەل وتىنى ەكسپورتىنا قويىلعان شەكتەۋلەردى مەرزىمىنەن بۇرىن الىپ تاستاۋ جۇمىستارى باستالاتىنىن جەتكىزدى.
الايدا ساراپشىلار رەسەيدەن جەتكىزىلەتىن ديزەل كولەمى اقش-تاعى باعانى ايتارلىقتاي تومەندەتۋگە جەتكىلىكسىز بولۋى مۇمكىن دەپ ەسەپتەيدى. ولاردىڭ پىكىرىنشە، ترامپتىڭ بۇل شەشىمى كونگرەسس سايلاۋى قارساڭىندا ەلدەگى جانارماي باعاسىنىڭ ءوسۋىن تەجەۋگە باعىتتالعان.
ال ۋكراينا پرەزيدەنتى ۆلاديمير زەلەنسكي رەسەيگە مۇناي ونىمدەرىن ساتۋعا رۇقسات بەرۋدى قاتاڭ سىنعا الدى. ونىڭ ايتۋىنشا، رەسەيدىڭ مۇنايدان تۇسەتىن تابىسى سوعىستى قارجىلاندىرۋعا جۇمسالادى.
«رەسەيگە قاتىستى سانكتسيالاردى ناقتى ءارى ۇزاق مەرزىمدى دەەسكالاتسيالىق كەلىسىمسىز جەڭىلدەتۋ – ايقىن السىزدىك. رەسەيگە مۇناي ونىمدەرىن ساتۋعا رۇقسات بەرۋ – سوعىسقا سالىنعان ينۆەستيتسيا»، - دەدى زەلەنسكي.
سونىمەن قاتار ۋكراينا پرەزيدەنتى اقش وكىلدەرىمەن فلوريدادا وتكەن كەزدەسۋدە سوعىستى توقتاتۋ، قاۋىپسىزدىك كەپىلدىكتەرى جانە ۋكراينانى قىسقا دايىنداۋ ماسەلەلەرى تالقىلانعانىن ايتتى. كەزدەسۋ قورىتىندىسىندا تاراپتار سوعىستى اياقتاۋ ءۇشىن ديپلوماتيالىق كۇش-جىگەردى جالعاستىرۋعا كەلىسكەن.
