اقش پرەزيدەنتى دونالد ترامپ ءيزرايلدىڭ دوحادا پالەستينالىق حاماس قوزعالىسىنىڭ جوعارى لاۋازىمدى مۇشەلەرىن نىساناعا الىپ جاساعان اۋە شابۋىلىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ول بۇل قادامعا «قاتتى وكىنەتىنىن» جەتكىزدى.
اق ءۇيدىڭ ءباسپاسوز حاتشىسى كەرولاين ءليۆيتتىڭ ايتۋىنشا، قاتار – امەريكا قۇراما شتاتتارىنىڭ سەنىمدى وداقتاسى جانە ەگەمەن ەل، ال ونى بىرجاقتى بومبالاۋ ءيزرايلدىڭ دە، اقش-تىڭ دا ماقساتتارىنا قىزمەت ەتپەيدى.
ليۆيتت سوققى تۋرالى ترامپ اكىمشىلىگى الدىن الا حاباردار بولعانىن ايتىپ ءوتتى. پرەزيدەنت ارنايى وكىل ستيۆ ۋيتكوففقا قاتار بيلىگىنە الداعى شابۋىل تۋرالى ەسكەرتۋ تاپسىرعان.
«پرەزيدەنت قاتاردى اقش-تىڭ مىقتى دوسى جانە سەرىكتەسى دەپ بىلەدى. ول بۇل شابۋىلعا وكىنىش بىلدىرەدى جانە گازاداعى بارلىق كەپىلگە الىنعانداردىڭ بوساتىلعانىن، سوعىستىڭ ءدال قازىر توقتاعانىن قالايدى»، — دەدى ليۆيتت.
يزرايل جاساعان سوققىنىڭ باستى نىساناسى حاماس كەلىسسوزشىسى حاليل ال-حايا بولعانى حابارلاندى. ء«ال-جازيرانىڭ» دەرەگىنشە، ونىڭ ۇلى قازا تاپقان. سونىمەن قاتار قاتاردىڭ ىشكى قاۋىپسىزدىك قىزمەتىنىڭ وكىلى بادەر سااد مۋحاممەد ال-حۋمەيدي اد-دۋساري دا قازا تاپتى.
قاتار سىرتقى ىستەر مينيسترلىگى بۇل شابۋىلدى «قورقاق ارەكەت» دەپ اتاپ، حالىقارالىق زاڭداردىڭ ورەسكەل بۇزىلعانىن مالىمدەدى. ايماق ەلدەرى، سونداي-اق فرانتسيا مەن ۇلىبريتانيا باسشىلارى دا ءيزرايلدىڭ ارەكەتىن سىنعا الدى.
ءليۆيتتىڭ ايتۋىنشا، شابۋىلدان كەيىن ترامپ يزرايل پرەمەر-ءمينيسترى بينيامين نەتانياحۋمەن جانە قاتار پرەمەر-ءمينيسترى شەيح مۋحاممەد بين ابدۋلراحمان ال تانيمەن تەلەفون ارقىلى سويلەستى. يزرايل سوققى ءۇشىن جاۋاپكەرشىلىكتى تولىق موينىنا الدى.
