بۇقارالىق سپورتتى دامىتۋ تەك سپورت مەكتەپتەرى مەن جارىستار وتكىزۋمەن شەكتەلمەيدى. ادامداردىڭ دەنە بەلسەندىلىگىمەن تۇراقتى، قاۋىپسىز ءارى ءوز دەڭگەيىنە ساي اينالىسۋىنا مۇمكىندىك بەرەتىن قولجەتىمدى ينفراقۇرىلىمنىڭ بولۋى دا اسا ماڭىزدى. الماتى تاۋ كلاستەرى مەن «Almaty SuperSki» جوباسىن دامىتۋدا ءدال وسى ءتاسىل باسشىلىققا الىنعان.
بولاشاق كۋرورتتىڭ نەگىزگى قاعيداتتارىنىڭ ءبىرى - ونىڭ كەڭ اۋديتورياعا باعىتتالۋى. جوبا اياسىندا ۇزىندىعى شامامەن 60 شاقىرىم بولاتىن تاۋ شاڭعىسى تراسسالارىن سالۋ جوسپارلانعان. كۋرورتتىڭ وتكىزۋ قابىلەتى تاۋلىگىنە 10 مىڭنان استام شاڭعىشىنى قابىلداۋعا مۇمكىندىك بەرەدى.
بۇل رەتتە تراسسالاردىڭ شامامەن 70%-ى بالالار مەن جاڭادان ۇيرەنۋشىلەرگە ارنالماق. مۇنداي شەشىم تاۋ شاڭعىسى ينفراقۇرىلىمىن دامىتۋعا دەگەن كوزقاراستى وزگەرتەدى. ياعني كۋرورت تەك تاجىريبەلى سپورتشىلارعا ەمەس، بالالارعا، وتباسىلارعا جانە تاۋ شاڭعىسىن العاش رەت مەڭگەرگىسى كەلەتىن ازاماتتارعا دا قولجەتىمدى بولادى.
بۇقارالىق سپورت ءۇشىن ينفراقۇرىلىمنىڭ ساپاسىمەن قاتار، ونىڭ قولجەتىمدىلىگى دە ماڭىزدى. ادامنىڭ العاشقى تاجىريبەسى قاۋىپسىز، تۇسىنىكتى جانە قولايلى بولعان جاعدايدا ونىڭ سپورتپەن تۇراقتى اينالىسۋ ىقتيمالدىعى دا ارتادى. سوندىقتان باستاۋىش دەڭگەيگە ارنالعان تراسسالاردىڭ كوپ بولۋى تەك تۋريستىك دەمالىسقا عانا ەمەس، تاۋ سپورتىن ۇناتاتىن ادامدار قاۋىمىن كەڭەيتۋگە دە مۇمكىندىك بەرەدى.
جوبانىڭ بالالار مەن وقۋشىلار ءۇشىن دە ماڭىزى زور بولۋى مۇمكىن. الماتى قالاسىنىڭ اكىمدىگى Kazakh Tourism Development كومپانياسىمەن بىرلەسىپ بولاشاق كۋرورت اۋماعىندا دەنە شىنىقتىرۋ ساباقتارىن وتكىزۋ مۇمكىندىگىن پىسىقتاپ جاتىر.
بۇل ءتاسىل تاۋ ينفراقۇرىلىمىن جاڭا فورماتتا پايدالانۋعا جول اشادى. كۋرورت تەك تۋريستىك نىسان رەتىندە عانا ەمەس، وقۋشىلاردى تاۋ سپورتىمەن جۇيەلى تۇردە تانىستىراتىن الاڭعا اينالا الادى.
سپورتتىق ۇلت قالىپتاستىرۋ تۇرعىسىنان مۇنىڭ ۇزاق مەرزىمدى ماڭىزى بار. سپورتقا قىزىعۋشىلىق كوبىنە جاڭا باعىتتى بايقاپ كورۋگە بەرىلگەن العاشقى مۇمكىندىكتەن باستالادى. مۇنداي مۇمكىندىك نەعۇرلىم كەڭ بولسا، بالالار مەن ەرەسەكتەردىڭ بەلسەندى ءومىر سالتىن كۇندەلىكتى ادەتكە اينالدىرۋ الەۋەتى سوعۇرلىم جوعارى بولادى.
«Almaty SuperSki» جوباسى وتباسىلىق سپورتتى دامىتۋعا دا جاعداي جاسايدى. جاڭادان ۇيرەنۋشىلەرگە ارنالعان تراسسالاردىڭ باسىم بولۋى ءارتۇرلى دايىندىق دەڭگەيىندەگى وتباسى مۇشەلەرىنە بىرگە دەمالۋعا مۇمكىندىك بەرەدى. وسىلايشا سپورت جەكە جاتتىعۋدان وتباسىنىڭ ورتاق بەلسەندى دەمالىسىنا اينالادى.
بولاشاقتا بۇل تاۋ شاڭعىسىنا جانە بەلسەندى دەمالىستىڭ وزگە دە تۇرلەرىنە دەگەن تۇراقتى ىشكى سۇرانىستى قالىپتاستىرۋى مۇمكىن. كۋرورتقا العاش رەت تۋريست رەتىندە كەلگەن ادام ۋاقىت وتە تۇراقتى كەلۋشىگە اينالىپ، نۇسقاۋشىلاردىڭ قىزمەتىن پايدالانىپ، سپورتپەن جۇيەلى تۇردە اينالىسا الادى جانە وتباسى مەن دوستارىن بەلسەندى دەمالىسقا تارتا الادى.
وسى تۇرعىدان العاندا تۋريستىك ينفراقۇرىلىم الەۋمەتتىك ماڭىزى بار كەڭ اۋقىمدى فۋنكتسيا اتقارا باستايدى.
زاماناۋي كۋرورت تەك شاڭعى تەبۋدى بۇرىننان بىلەتىندەرگە ەمەس، سپورتتاعى العاشقى قادامىن ەندى جاساپ جاتقان ادامدارعا دا مۇمكىندىك بەرۋى ءتيىس. سوندىقتان بالالار مەن جاڭادان ۇيرەنۋشىلەرگە ارنالعان تراسسالاردىڭ جوعارى ۇلەسى جوبانىڭ ماڭىزدى ەرەكشەلىكتەرىنىڭ ءبىرى بولىپ سانالادى.
الماتى ءۇشىن مۇنداي ءتاسىلدىڭ ماڭىزى ەرەكشە. تاۋ كلاستەرىن دامىتۋ ءوڭىردىڭ تابيعي الەۋەتىن تەك تۋريستىك ارتىقشىلىق رەتىندە عانا ەمەس، بۇقارالىق سپورتتى دامىتۋ رەسۋرسى رەتىندە پايدالانۋعا مۇمكىندىك بەرەدى.
وسى تۇرعىدا «Almaty SuperSki» بۇدان دا كەڭ مىندەتتىڭ ءبىر بولىگىنە اينالادى: بەلسەندى ءومىر سالتىن قولجەتىمدى ەتۋ، بالالار مەن جاسوسپىرىمدەردىڭ سپورتپەن اينالىسۋ مۇمكىندىگىن كەڭەيتۋ جانە كۇن سايىن مىڭداعان ادام پايدالانا الاتىن زاماناۋي ينفراقۇرىلىم قالىپتاستىرۋ.
سپورتتىق ۇلت ساپالى جانە قولجەتىمدى سپورت ينفراقۇرىلىمى قالىپتاسقان جەردە داميدى. بالالارعا، جاڭادان ۇيرەنۋشىلەرگە جانە وتباسىلارعا ارنالعان مۇمكىندىكتەر نەعۇرلىم كوپ بولسا، بۇقارالىق سپورتتىڭ بازاسى دا سوعۇرلىم كەڭەيەدى.
سوندىقتان «Almaty SuperSki» جوباسىن تەك جاڭا تۋريستىك نىسان رەتىندە قاراستىرۋ جەتكىلىكسىز. بۇل بەلسەندى ءومىر سالتىن ىنتالاندىراتىن، جاڭا بۋىندى تاۋ سپورتتارىمەن تانىستىراتىن جانە الماتىنىڭ تابيعي مۇمكىندىكتەرىن تولىققاندى سپورتتىق ءارى تۋريستىك ينفراقۇرىلىمعا اينالدىراتىن ورتاعا سالىنعان ينۆەستيتسيا.
