Foto: videodan alyndy
10 qazan künı Şymkentte ötken änşı Qairat Nūrtastyŋ konsertı kezınde körermen arasynda dürbeleŋ tuyndady. Kıreberıste jinalǧan halyq bır-bırın qysyp, keibır adamdar qūlap, jaraqat alǧan. Oqiǧa ornynan tüsırılgen videolar äleumettık jelılerde tarady, dep habarlaidy “Adyrna”.
Kuägerlerdıŋ aituynşa, körermen arasynda esınen tanyp qalǧandar bolǧan. Sondai-aq konsertten keiın keibır adamdar aiaq kiımderınen aiyrylyp, üilerıne jalaŋaiaq qaituǧa mäjbür bolǧany turaly aqparat tarady.
Oqiǧaǧa bailanysty Freedom Afişa kompaniiasy tüsınıkteme berdı. Kompaniianyŋ habarlauynşa, konserttı ūiymdastyrumen Show Service ainalysqan. Al Freedom Afişa ūiymdastyruşy bölgen kvota aiasynda biletterdı satuǧa, olardy tekseruge jäne körermenderge bılezık taratuǧa kömektesken erıktılerdıŋ jūmysyna jauapty bolǧan.
Kompaniianyŋ mälımetınşe, konsert alaŋyn daiyndau, körermendı kırgızu jäne küzettı ūiymdastyru onyŋ mındetıne kırmegen.
Freedom Afişa qūqyq qorǧau organdaryna qajettı aqparatty ūsynuǧa jäne oqiǧanyŋ sebepterın anyqtauǧa kömektesuge daiyn ekenın mälımdedı.
Şymkent qalasynyŋ densaulyq saqtau basqarmasy oqiǧa saldarynan 18 jastaǧy qyzdyŋ auyr jaraqat alyp, medisinalyq mekemege jetkızılgenın habarlady. Qazırgı uaqytta onyŋ jaǧdaiy auyr ekenı aityldy.
Äleumettık jelı qoldanuşylary da konsert kezındegı jaǧdaiǧa qatysty pıkırlerın bıldırıp, körermennıŋ qauıpsızdıgı mäselesın köterdı. Oqiǧa ornynan jedel järdem kölıkterınıŋ suretterı de jariialandy.
Polisiia qylmystyq ıs qozǧady
Şymkent qalalyq polisiia departamentı konsert kezınde qauıpsızdık talaptaryna sai kelmeitın qyzmet körsetu faktısı boiynşa qylmystyq ıs tırkelgenın habarlady.
«Konsert kezınde qauıpsızdık talaptaryna sai kelmeitın qyzmet körsetu faktısı boiynşa qylmystyq ıs tırkeldı.
Adamdardyŋ köp jinaluyna bailanysty keluşılerdıŋ bırı zardap şektı. Qyz medisinalyq mekemede därıgerlerdıŋ baqylauynda.
Is-şarany ūiymdastyruşylar polisiiaǧa jetkızıldı. Sotqa deiıngı tergep-tekseru aiasynda oqiǧanyŋ barlyq män-jaiy anyqtaluda.
Ūiymdastyruşylardyŋ äreketterıne qūqyqtyq baǧa berıledı. Tergeu nätijesı boiynşa tiıstı prosestık şeşım qabyldanady», – dep mälımdedı polisiia.
Oqiǧadan keiın ūiymdastyruşylar men polisiia arasyndaǧy jauapkerşılık mäselesı de talqylana bastady. Ūiymdastyruşylar qauıpsızdıkke qatysty mındetterdı özge taraptarǧa jüktese, polisiia ıs-şarany ötkızu kezınde qauıpsızdık talaptarynyŋ saqtaluyna bailanysty tergeu jürgızıp jatyr.
Qazırgı uaqytta oqiǧanyŋ naqty sebepterı men oǧan jauapty tūlǧalar tergeu nätijesınde anyqtaluy tiıs.
