ءماجىلىس سپيكەرى ەرلان قوشانوۆ دەپۋتات باقىتجان بازاربەككە اگرەسسيا جانە ادەپسىز ارەكەتى ءۇشىن ەسكەرتۋ جاسادى، دەپ جازادى "ادىرنا" پورتالى.
«ەگەر جۇمىس ىستەي الماساڭىزدار، ءبىز دەپۋتاتتارمەن بىرگە ءسىزدى مينيسترمەن قوسا مينيسترلىكتەن قۋىپ شىعامىز. ءبىز ايامايمىز»، - دەدى بازاربەك سارسەنبى كۇنى ءماجىلىس وتىرىسىندا ۆيتسە-مينيستر ابىلقايىر تامابەككە.
بۇل مالىمدەمەگە جاۋاپ رەتىندە ءماجىلىس توراعاسى ەرلان قوشانوۆ «ءوزىن-ءوزى ۇسىنعان كانديداتقا» ەسكەرتۋ جاسادى.
«باقىتجان جۇمابەكۇلى، ءبىرىنشى كەزەكتە، دەپۋتاتتىق ەتيكا دەگەن بار. ءسىز قاتتى كەتپەڭىز. اگرەسسياسىز سويلەڭىز. ەكىنشىدەن، مەن جاقتاپ وتىرعان جوقپىن، ءسىز قويعان سۇراق دۇرىس، 10 ميلليون گەكتارداي جەر قايتارىلدى، بۇل ءبىرىنشى كەزەكتە، «جەر اماناتى» كوميسسياسىنىڭ جۇمىسى. سولاي ما؟ ال ءسىزدىڭ سۇراعىڭىز، جەر ءادىل تۇردە ءبولىندى مە، الدە ادىلەتسىز بە؟ بۇل، بىرىنشىدەن، جەرگىلىكتى اتقارۋشى ورگاندارعا، ەكىنشىدەن، ۋاكىلەتتى ورگاندارعا، ولاردىڭ جاۋاپكەرشىلىگىنە قاتىستى ماسەلە»، - دەپ اتاپ ءوتتى تومەنگى پالاتا توراعاسى.
ول «جەر اماناتى» كوميسسياسىنىڭ قۇرامىنا باس پروكۋراتۋرا، اۋىل شارۋاشىلىعى مينيسترلىگىنىڭ باسشىلىعى، جەر رەسۋرستارى كوميتەتىنىڭ باسشىسى، دەپۋتاتتار، قوعام وكىلدەرى كىرەتىنىن ەسكە سالدى.
«ءسىز وسى كوميسسيانىڭ جەتەكشىلەرىنىڭ ءبىرىسىز، سوندىقتان مەن سىزدەرگە «جالىندى سالەم» جەتكىزگىم كەلەدى – جەر اماناتى كوميسسياسىندا وسى جەرلەردى ودان ءارى ءادىل ءبولۋ ماسەلەلەرى بويىنشا بارلىق وكىلەتتىكتەر بار. كەلىسەسىزدەر مە؟ سوندىقتان بۇل ماسەلەنى جەرگىلىكتى بيلىك قاراۋى كەرەك، بۇل جەردە مينيسترلىكتىڭ دە جاۋاپكەرشىلىگى بار، سونىمەن بىرگە كوميسسيا – جەردى قايتارۋ جانە ءبولۋ ماسەلەلەرى بويىنشا ءسىز دە جاۋاپتىسىز. ءسىزدىڭ قۇرامىڭىزعا باس پروكۋراتۋرانىڭ وكىلدەرى ەنگىزىلگەن. تاعى دا قايتالايمىن، كوميسسيا قۇرامىنا بارلىق مەملەكەتتىك ورگانداردىڭ وكىلدەرى كىرەدى. بىراق، باقىتجان جۇمابەكۇلى، سۇراق قويعاندا، بۇل ءبىرىنشى رەت ەمەس، مەن پالاتا باسشىسى رەتىندە رەگلامەنتتىڭ ساقتالۋىن قاداعالاي وتىرىپ، سىزگە ەسكەرتۋ جاسايمىن»، - دەدى قوشانوۆ.
ايتا كەتەيىك، «جەر اماناتى» - ماجىلىسكە ءوزىن-ءوزى ۇسىنعان باقىتجان بازاربەك مۇشە بولعان «امانات» پارتياسىنىڭ كوميسسياسى.
