اقش-تىڭ ىشكى قاۋىپسىزدىك مينيسترلىگى ەلدە جۇمىس ىستەۋدى جوسپارلاعان شەتەلدىك ستۋدەنتتەر ءۇشىن وقۋ مەن تاجىريبەدەن وتۋگە بايلانىستى تولەمدەردى ايتارلىقتاي ارتتىرۋدى ۇسىندى. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
ۇسىنىلعان جوسپارعا سايكەس، F-1 ستۋدەنتتىك ۆيزاسىمەن كەلگەن شەتەل ازاماتتارى قوسىمشا تاجىريبەلىك دايىندىق باعدارلاماسىنا (OPT) قاتىسۋ ءۇشىن اككرەديتتەلگەن وقۋ ورنىنا 70 مىڭ دوللار، ال جۇمىس ورنىنداعى قوسىمشا وقىتۋ ءۇشىن تاعى 30 مىڭ دوللار تولەۋى ءتيىس بولادى.
OPT باعدارلاماسى شەتەلدىك ستۋدەنتتەرگە وقۋ سەمەسترى كەزىندە اپتاسىنا 20 ساعاتقا دەيىن وندىرىستىك تاجىريبەدەن وتۋگە، سونداي-اق وقۋىن اياقتاعاننان كەيىن بەلگىلى ءبىر مەرزىم جۇمىس ىستەۋگە مۇمكىندىك بەرەدى. عىلىم، تەحنولوگيا، ينجەنەريا جانە ماتەماتيكا (STEM) سالالارى بويىنشا ديپلوم العان تۇلەكتەر ءۇشىن بۇل مەرزىم ۇزارتىلۋى مۇمكىن. قازىرگى تاڭدا باعدارلاماعا قاتىسۋ قۇنى شامامەن 500 دوللاردى قۇرايدى.
اقش ىشكى قاۋىپسىزدىك مينيسترلىگىنىڭ مالىمەتىنشە، جاڭا ەرەجە الاياقتىقتىڭ الدىن الۋعا، يمميگراتسيالىق جۇيەنىڭ تۇتاستىعىن نىعايتۋعا جانە امەريكالىق جۇمىسشىلاردىڭ مۇددەسىن قورعاۋعا باعىتتالعان.
«مينيسترلىك جۇمىس بەرۋشىلەردىڭ، ستۋدەنتتەردىڭ جانە ءبىلىم بەرۋ ۇيىمدارىنىڭ F-1 ۆيزاسى بويىنشا ەلگە كىرۋ تالاپتارىنا سايكەس ارەكەت ەتۋىن قامتاماسىز ەتۋ ءۇشىن تولەم ەنگىزىپ وتىر»، – دەپ مالىمدەدى ۆەدومستۆو.
مۇنداي تاجىريبەلىك باعدارلامالار كوبىنە ستۋدەنتتەردىڭ H-1B جۇمىس ۆيزاسىنا ءوتۋ كەزەڭى رەتىندە قاراستىرىلادى. دونالد ترامپ اكىمشىلىگى بۇل ۆيزا بويىنشا الىمداردى دا كوتەرگەن بولاتىن. H-1B باعدارلاماسى ونداعان جىلدار بويى الەمنىڭ تۇكپىر-تۇكپىرىنەن كەلگەن جاس ينجەنەرلەر مەن عالىمدارعا اقش ۋنيۆەرسيتەتتەرىندە العان ءبىلىمىن جوعارى جالاقىلى جۇمىسقا جانە كەيىن تۇراقتى تۇرۋ قۇقىعىنا اينالدىرۋعا مۇمكىندىك بەرىپ كەلدى. اقش-تىڭ ءىرى تەحنولوگيالىق كومپانيالارى بىلىكتى ماماندار تاپشىلىعىن وسى كادرلار ەسەبىنەن تولىقتىرىپ وتىر.
ايتا كەتەيىك، دونالد ترامپ 2024 جىلعى سايلاۋالدى ناۋقانى كەزىندە شەتەلدىك ستۋدەنتتەردىڭ اقش-تا قالۋىن جەڭىلدەتۋگە ۋادە بەرىپ، جوعارى وقۋ ورنىن تامامداعاندارعا گرين-كارتانى اۆتوماتتى تۇردە بەرۋدى ۇسىنعان ەدى.
مينيسترلىكتىڭ ۇسىنىسى الداعى 30 كۇن ىشىندە قوعامدىق تالقىلاۋدان وتەدى. وسىدان كەيىن قۇجات تۇپكىلىكتى بەكىتىلەدى. الايدا ۆەدومستۆو جاڭا تالاپتاردى ەنگىزبەس بۇرىن مەكتەپتەرگە، ستۋدەنتتەرگە جانە جۇمىس بەرۋشىلەرگە دايىندالۋ ءۇشىن قوسىمشا 60 كۇن ۋاقىت بەرىلەتىنىن مالىمدەدى.
