الەۋمەتتىك جەلىدە كىشكەنتاي بالانى كولىكتە ەرنىنەن سۇيگەن ايەلدىڭ ۆيدەوسى تارادى. وقيعاعا قاتىستى استانا قالاسى الماتى اۋدانىنىڭ پوليتسيا باسقارماسى تەكسەرۋ جۇرگىزىپ جاتىر، دەپ حابارلايدى "ادىرنا" ءتىلشىسى.
پوليتسيانىڭ مالىمەتىنشە، ۆيدەوداعى ايەلدىڭ جاسى 23-تە. ول بالانىڭ اناسىنىڭ قۇربىسى بولىپ شىققان. قۇقىق قورعاۋ ورگانى وكىلدەرىنىڭ حابارلاۋىنشا، قازىر ايەلگە قاتىستى تەكسەرۋ جۇرگىزىلۋدە. ونىڭ قورىتىندىسى بويىنشا بولعان جاعدايعا قۇقىقتىق باعا بەرىلەدى.
«قازىر قىزعا قاتىستى تەكسەرۋ جۇرگىزىلىپ جاتىر. تەكسەرۋ اياقتالعاننان كەيىن قۇقىق قورعاۋ ورگاندارى بولعان جاعدايعا قۇقىقتىق باعا بەرەدى»، – دەپ حابارلادى استانا قالاسى الماتى اۋدانىنىڭ پوليتسيا باسقارماسى.
سونىمەن قاتار پوليتسيا بالانىڭ اناسىنا قاتىستى دا شارا قولدانىلعانىن مالىمدەدى. ۆەدومستۆونىڭ مالىمەتىنشە، بەينەجازبانى بالانىڭ اناسى ءوزى تۇسىرگەن. ول بالانى تاربيەلەۋ جانە ونىڭ قاۋىپسىزدىگىن قامتاماسىز ەتۋ مىندەتتەرىن تيىسىنشە ورىنداماعانى ءۇشىن اكىمشىلىك جاۋاپكەرشىلىككە تارتىلعان.
بەينەجازبا الەۋمەتتىك جەلىدە تاراعاننان كەيىن بالانىڭ اناسى ونىڭ كوڭىل كوتەرۋ ماقساتىندا تۇسىرىلگەنىن ايتىپ، ۆيدەونى جاريالاعان ادامنان ءوشىرۋدى سۇراعان.
