«Astana» halyqaralyq qarjy ortalyǧynda (AHQO) jaŋa IT-kompaniia jūmysyn bastady. Kompaniianyŋ direktory jäne bas atqaruşy direktory qyzmetıne Almatynyŋ būrynǧy äkımı Erbolat Dosaevtyŋ ūly Nūrlan Asqarbekov taǧaiyndalǧan, dep habarlaidy “Adyrna” ūlttyq portaly Tizgin.kz saityna sılteme jasap.
AHQO-nyŋ Qarjy qyzmetterın retteu komitetı (AFSA) jariialaǧan derekke säikes, atalǧan kompaniia 2026 jylǧy 2 qazanda jeke tırkelgen. Qazır onyŋ märtebesı – belsendı. Zaŋdy mekenjaiy Astananyŋ Esıl audanyndaǧy Mäŋgılık El daŋǧyly, 55/20 mekenjaiynda ornalasqan.
Resmi tızılımde Nūrlan Asqarbekov kompaniianyŋ direktory ärı CEO-sy retınde körsetılgen. Onyŋ ekı qyzmet boiynşa da ökılettıgı 2 qazannan bastalǧan.
Kompaniianyŋ negızgı qyzmet baǧyty retınde baǧdarlamalyq qamtamasyz etudı äzırleudı taŋdaǧan. Ol jasandy intellekt, robototehnika jäne avtomattandyru salalaryna arnalǧan tehnologiialyq şeşımder äzırleudı josparlap otyr.
Sondai-aq onyŋ qyzmet aiasyna baǧdarlamalyq önımderdı testıleu, türlı jüielerdı integrasiialau, ǧylymi-zertteu jäne täjıribelık-konstruktorlyq jūmystar jürgızu kıredı. Būdan bölek, kompaniia osy baǧyttar boiynşa tehnikalyq qoldau körsetpek.
Tızılımdegı aksionerler qatarynda Circle Limited kompaniiasy körsetılgen. Kompaniianyŋ kapitaly ärqaisysynyŋ nominaldy qūny 1 AQŞ dollaryn qūraityn 100 jai aksiiadan tūrady. Al jariialanǧan aksiialarynyŋ jalpy qūny – 100 dollar.
