ەلوردا تۇرعىندارى تۇنگى ۋاقىتتا قالا كوشەلەرىندە اسكەري تەحنيكانىڭ كوپتەپ جۇرگەنىن بايقاپ، الەۋمەتتىك جەلىلەردە فوتو جانە بەينەماتەريالدار جاريالاعان، دەپ حابارلايدى "ادىرنا".
مەملەكەتتىك كۇزەت قىزمەتىنىڭ مالىمەتىنشە، اسكەري تەحنيكانىڭ قالا كوشەلەرىندە كوبەيۋى 5-6 قازاندا استانادا وتەتىن حالىقارالىق ساياسي ءىس-شارالارعا دايىندىققا بايلانىستى.
ءىس-شارالار كەزىندە قوعامدىق ءتارتىپ پەن قاۋىپسىزدىكتى قامتاماسىز ەتۋ ءۇشىن ارنايى مەملەكەتتىك جانە قۇقىق قورعاۋ ورگاندارى، سونداي-اق قازاقستان قارۋلى كۇشتەرىنىڭ بولىمشەلەرى جۇمىلدىرىلادى.
وسىعان بايلانىستى ەلوردانىڭ بىرقاتار كوشەسىندە كولىك قوزعالىسىنا ۋاقىتشا شەكتەۋلەر ەنگىزىلەدى. قالادا قاۋىپسىزدىك شارالارى دا كۇشەيتىلەدى.
مەملەكەتتىك كۇزەت قىزمەتى استانا تۇرعىندارى مەن قوناقتارىن ەنگىزىلەتىن ۋاقىتشا شەكتەۋلەرگە تۇسىنىستىكپەن قاراۋعا شاقىردى.
