الجير پارلامەنتىنىڭ تومەنگى پالاتاسى قىلمىستىق كودەكسكە وزگەرىستەر ەنگىزۋ تۋرالى زاڭ جوباسىن ماقۇلدادى، دەپ حابارلايدى “ادىرنا” انادولىعا سىلتەپ.
قۇجات قاساقانا ءورت قويعان جانە بالا ۇرلاعان ادامدارعا ءولىم جازاسىن تاعايىنداۋدى كوزدەيدى.
زاڭ جوباسىنا سايكەس، مەملەكەتتىك نەمەسە جەكە مەنشىك نىساندارىن شەتەلدىك تۇلعالاردىڭ تاپسىرماسىمەن قاساقانا جويۋ، مەملەكەتتىك وپاسىزدىق، تىڭشىلىق نەمەسە ۇيىمداسقان قىلمىس اياسىندا ورمان مەن ەگىستىك القاپتارىن ورتەۋ ءولىم جازاسىنا اكەلۋى مۇمكىن.
سونداي-اق بالا ۇرلاعانى ءۇشىن دە ەڭ اۋىر جازا قاراستىرىلعان. ەگەر قىلمىس كەزىندە ازاپتاۋ، جىنىستىق زورلىق نەمەسە بالاعا قاتىستى وزگە دە زورلىق-زومبىلىق جاسالسا، جاۋاپكەرشىلىك كۇشەيتىلەدى.
قۇجاتتا مۇنداي قىلمىستارعا قاتىستى جەڭىلدەتەتىن ءمان-جايلاردى قولدانۋعا شەكتەۋ قويۋ ۇسىنىلعان. زاڭ جوباسى الدىمەن پارلامەنتتىڭ جوعارعى پالاتاسى — ۇلت كەڭەسىندە ۇشتەن ەكى ەمەس، تورتتەن ءۇش كوپشىلىك داۋىسپەن ماقۇلدانۋى ءتيىس. ودان كەيىن پرەزيدەنت قول قويىپ، رەسمي باسىلىمدا جاريالاعان جاعدايدا كۇشىنە ەنەدى.
الجيردە ءولىم جازاسى زاڭنامادا بىرقاتار قىلمىس ءۇشىن ساقتالعانىمەن، ونى ورىنداۋعا 1993 جىلدان بەرى موراتوري ەنگىزىلگەن.
