فوتو: Polisia.kz
سولتۇستىك قازاقستان وبلىسىندا جىل باسىنان بەرى كوشى-قون زاڭناماسىن بۇزعان 679 شەتەلدىك ازامات اكىمشىلىك جاۋاپكەرشىلىككە تارتىلدى. ونىڭ 633-ءى كوشى-قون تالاپتارىن بۇزعان. بۇل تۋرالى سقو پوليتسيا دەپارتامەنتى مالىمدەدى، دەپ حابارلايدى "ادىرنا".
اقپاراتقا سايكەس، 45 شەتەلدىك ازامات قازاقستان اۋماعىنان شىعارىلعان. سونىمەن قاتار 152 ادامنىڭ ەلدە بولۋ مەرزىمى قىسقارتىلدى.
اكىمشىلىك جاۋاپكەرشىلىككە تارتىلعانداردىڭ اراسىندا جولاۋشىلار تاسىمالىمەن اينالىسقان تاجىكستان ازاماتى دا بار. پەتروپاۆل تۇرعىنى تاكسي جۇرگىزۋشىسىنىڭ دورەكىلىگىنە شاعىمدانعاننان كەيىن، پوليتسيا ونىڭ قازاقستاندا زاڭ تالاپتارىن بۇزا وتىرىپ جۇمىس ىستەگەنىن انىقتادى.
42 جاستاعى ەر ادام ەلگە كىرگەن كەزدە جۇمىسقا ورنالاسۋ نەمەسە كاسىپكەرلىك قىزمەتپەن اينالىسۋ ماقساتىن كورسەتپەگەن. سوعان قاراماستان، قازاقستان اۋماعىندا جولاۋشىلار تاسىمالىمەن اينالىسقان. بۇعان دەيىن دە وسىعان ۇقساس قۇقىق بۇزۋشىلىق ءۇشىن اكىمشىلىك جاۋاپكەرشىلىككە تارتىلعانى بەلگىلى بولدى.
قۇقىق بۇزۋشىلىقتىڭ ءبىر جىل ىشىندە قايتالانۋىنا بايلانىستى پوليتسيا ءتيىستى ماتەريالداردى جيناپ، اكىمشىلىك سوتقا جولداعان.
سوت شەشىمىمەن ازاماتقا ءبىر تاۋلىك اكىمشىلىك قاماۋ تاعايىندالىپ، كەيىن قازاقستان رەسپۋبليكاسىنان بەس جىل مەرزىمگە شىعارۋ تۋرالى شەشىم قابىلداندى.
