Flydubai اۋە كومپانياسى دۋبايدان تەل-اۆيۆكە باعىت العان FZ1073 رەيسىندە بولعان وقيعاعا قاتىستى تەرگەۋ اياقتالعانعا دەيىن يزرايلگە جانە كەرى باعىتتاعى بارلىق رەيسىن ۋاقىتشا توقتاتتى. بۇل تۋرالى تاسىمالداۋشى كومپانيانىڭ وكىلى مالىمدەدى، دەپ حابارلايدى «ادىرنا» ءتىلشىسى.
«بۇل ۋاقىتشا شەكتەۋ قۇزىرلى ورگاندارعا جۇمىستى جالعاستىرىپ، وقيعانىڭ بارلىق ءمان-جايىن انىقتاۋعا مۇمكىندىك بەرەدى»، – دەلىنگەن كومپانيا حابارلاماسىندا.
اۋە تاسىمالداۋشىسى بيلىك ورگاندارىمەن، اۆياتسيالىق رەتتەۋشىلەرمەن جانە اۋەجايلارمەن بىرلەسىپ جۇمىس ىستەپ جاتقانىن حابارلادى. رەيستەردى قايتا باستاۋ تۋرالى شەشىم جاڭا مالىمەتتەردىڭ تۇسۋىنە قاراي قايتا قارالادى. ازىرگە ۇشۋلاردى قالپىنا كەلتىرۋ كۇنى جاريالانعان جوق.
وقيعا 30 قىركۇيەك كۇنى تاڭەرتەڭ بولعان. ۇشقىشتار كابيناسىنداعى جانجالدان كەيىن ۇشاق اپاتتىق دابىل بەرىپ، ساۋد ارابياسىنىڭ تابۋك اۋەجايىنا شۇعىل قونعان. بارلىق جولاۋشى ۇشاقتان امان-ەسەن ءتۇسىرىلىپ، سول كۇنى كەشكە Flydubai كومپانياسىنىڭ باسقا ۇشاعىمەن يزرايلگە جەتكىزىلگەن.
يزرايل بيلىگى مەن جولاۋشىلاردىڭ مالىمەتىنشە، ەكىنشى ۇشقىش اۋە كەمەسىنىڭ كومانديرىنە پىشاقپەن شابۋىل جاساعان. وسىدان كەيىن ۇشاق كۇرت تومەندەي باستاعان. حابارلانعانداي، جولاۋشىلار شابۋىلداۋشىنى زالالسىزداندىرعان. ال اۋە كومپانياسى قوندىرۋدى بورتتا كەزەكشىلىكتەن تىس ۇشىپ بارا جاتقان Flydubai ۇشقىشتارى جۇزەگە اسىرعانىن مالىمدەدى.
وقيعانىڭ سەبەپتەرى مەن وعان تۇرتكى بولعان جايتتار ءالى دە تەرگەۋ نىسانى بولىپ وتىر. كومپانيا قۇزىرلى ورگاندار بارلىق دەرەكتى انىقتاعانعا دەيىن اسىعىس قورىتىندى جاساماۋعا شاقىردى.
رەيستەردىڭ توقتاتىلۋىنا بايلانىستى يزرايل دۋبايدا قالىپ قويعان ءوز ازاماتتارىن ەۆاكۋاتسيالاۋ ءۇشىن ارنايى رەيستەر دايىنداپ جاتىر. Ynet باسىلىمىنىڭ مالىمەتىنشە، قاۋىپسىزدىك شارالارىن ازىرلەۋ ماقساتىندا ءيزرايلدىڭ ىشكى قاۋىپسىزدىك قىزمەتى – «شاباك» وكىلدەرى بىرىككەن اراب امىرلىكتەرىنە بارعان. ەۆاكۋاتسيالىق رەيستەر 2 قازاندا باستالادى دەپ كۇتىلۋدە.
سوڭعى ايلاردا قاۋىپسىزدىككە بايلانىستى شەكتەۋلەر سالدارىنان ءيزرايلدىڭ اۋە كومپانيالارى ءباا-گە تۇراقتى رەيستەر ورىنداماعان. ءيزرايلدىڭ «ەل-ال» اۋە كومپانياسى قاراشا ايىندا دۋبايعا تۇراقتى رەيستەردى قايتا باستاۋدى جوسپارلاپ وتىرعانىن حابارلادى. الايدا بۇل ءۇشىن ءيزرايلدىڭ مەملەكەتتىك ورگاندارىنىڭ رۇقساتى قاجەت.
