Flydubai әуе компаниясы Дубайдан Тель-Авивке бағыт алған FZ1073 рейсінде болған оқиғаға қатысты тергеу аяқталғанға дейін Израильге және кері бағыттағы барлық рейсін уақытша тоқтатты. Бұл туралы тасымалдаушы компанияның өкілі мәлімдеді, деп хабарлайды «Адырна» тілшісі.
«Бұл уақытша шектеу құзырлы органдарға жұмысты жалғастырып, оқиғаның барлық мән-жайын анықтауға мүмкіндік береді», – делінген компания хабарламасында.
Әуе тасымалдаушысы билік органдарымен, авиациялық реттеушілермен және әуежайлармен бірлесіп жұмыс істеп жатқанын хабарлады. Рейстерді қайта бастау туралы шешім жаңа мәліметтердің түсуіне қарай қайта қаралады. Әзірге ұшуларды қалпына келтіру күні жарияланған жоқ.
Оқиға 30 қыркүйек күні таңертең болған. Ұшқыштар кабинасындағы жанжалдан кейін ұшақ апаттық дабыл беріп, Сауд Арабиясының Табук әуежайына шұғыл қонған. Барлық жолаушы ұшақтан аман-есен түсіріліп, сол күні кешке Flydubai компаниясының басқа ұшағымен Израильге жеткізілген.
Израиль билігі мен жолаушылардың мәліметінше, екінші ұшқыш әуе кемесінің командиріне пышақпен шабуыл жасаған. Осыдан кейін ұшақ күрт төмендей бастаған. Хабарланғандай, жолаушылар шабуылдаушыны залалсыздандырған. Ал әуе компаниясы қондыруды бортта кезекшіліктен тыс ұшып бара жатқан Flydubai ұшқыштары жүзеге асырғанын мәлімдеді.
Оқиғаның себептері мен оған түрткі болған жайттар әлі де тергеу нысаны болып отыр. Компания құзырлы органдар барлық деректі анықтағанға дейін асығыс қорытынды жасамауға шақырды.
Рейстердің тоқтатылуына байланысты Израиль Дубайда қалып қойған өз азаматтарын эвакуациялау үшін арнайы рейстер дайындап жатыр. Ynet басылымының мәліметінше, қауіпсіздік шараларын әзірлеу мақсатында Израильдің ішкі қауіпсіздік қызметі – «Шабак» өкілдері Біріккен Араб Әмірліктеріне барған. Эвакуациялық рейстер 2 қазанда басталады деп күтілуде.
Соңғы айларда қауіпсіздікке байланысты шектеулер салдарынан Израильдің әуе компаниялары БАӘ-ге тұрақты рейстер орындамаған. Израильдің «Эль-Аль» әуе компаниясы қараша айында Дубайға тұрақты рейстерді қайта бастауды жоспарлап отырғанын хабарлады. Алайда бұл үшін Израильдің мемлекеттік органдарының рұқсаты қажет.
