Flydubai äue kompaniiasy Dubaidan Tel-Avivke baǧyt alǧan FZ1073 reisınde bolǧan oqiǧaǧa qatysty tergeu aiaqtalǧanǧa deiın İzrailge jäne kerı baǧyttaǧy barlyq reisın uaqytşa toqtatty. Būl turaly tasymaldauşy kompaniianyŋ ökılı mälımdedı, dep habarlaidy «Adyrna» tılşısı.
«Būl uaqytşa şekteu qūzyrly organdarǧa jūmysty jalǧastyryp, oqiǧanyŋ barlyq män-jaiyn anyqtauǧa mümkındık beredı», – delıngen kompaniia habarlamasynda.
Äue tasymaldauşysy bilık organdarymen, aviasiialyq retteuşılermen jäne äuejailarmen bırlesıp jūmys ıstep jatqanyn habarlady. Reisterdı qaita bastau turaly şeşım jaŋa mälımetterdıŋ tüsuıne qarai qaita qaralady. Äzırge ūşulardy qalpyna keltıru künı jariialanǧan joq.
Oqiǧa 30 qyrküiek künı taŋerteŋ bolǧan. Ūşqyştar kabinasyndaǧy janjaldan keiın ūşaq apattyq dabyl berıp, Saud Arabiiasynyŋ Tabuk äuejaiyna şūǧyl qonǧan. Barlyq jolauşy ūşaqtan aman-esen tüsırılıp, sol künı keşke Flydubai kompaniiasynyŋ basqa ūşaǧymen İzrailge jetkızılgen.
İzrail bilıgı men jolauşylardyŋ mälımetınşe, ekınşı ūşqyş äue kemesınıŋ komandirıne pyşaqpen şabuyl jasaǧan. Osydan keiın ūşaq kürt tömendei bastaǧan. Habarlanǧandai, jolauşylar şabuyldauşyny zalalsyzdandyrǧan. Al äue kompaniiasy qondyrudy bortta kezekşılıkten tys ūşyp bara jatqan Flydubai ūşqyştary jüzege asyrǧanyn mälımdedı.
Oqiǧanyŋ sebepterı men oǧan türtkı bolǧan jaittar älı de tergeu nysany bolyp otyr. Kompaniia qūzyrly organdar barlyq derektı anyqtaǧanǧa deiın asyǧys qorytyndy jasamauǧa şaqyrdy.
Reisterdıŋ toqtatyluyna bailanysty İzrail Dubaida qalyp qoiǧan öz azamattaryn evakuasiialau üşın arnaiy reister daiyndap jatyr. Ynet basylymynyŋ mälımetınşe, qauıpsızdık şaralaryn äzırleu maqsatynda İzraildıŋ ışkı qauıpsızdık qyzmetı – «Şabak» ökılderı Bırıkken Arab Ämırlıkterıne barǧan. Evakuasiialyq reister 2 qazanda bastalady dep kütılude.
Soŋǧy ailarda qauıpsızdıkke bailanysty şekteuler saldarynan İzraildıŋ äue kompaniialary BAÄ-ge tūraqty reister oryndamaǧan. İzraildıŋ «El-Al» äue kompaniiasy qaraşa aiynda Dubaiǧa tūraqty reisterdı qaita bastaudy josparlap otyrǧanyn habarlady. Alaida būl üşın İzraildıŋ memlekettık organdarynyŋ rūqsaty qajet.
