FlyDubai ۇشاعىن توتەنشە جاعدايدا ۋكراينا مەن رەسەيدەن كەلگەن جولاۋشى-ۇشقىشتار قوندىردى. بۇل تۋرالى Israel Hayom باسىلىمى جازدى، دەپ حابارلايدى «ادىرنا» ءتىلشىسى.
«Flydubai اۋە كومپانياسىنىڭ ۇشاعىنداعى جانجالعا رەسەيلىك جانە ۋكراينالىق ۇشقىشتار قاتىسقان بولۋى مۇمكىن دەگەن اقپارات شىندىققا جاناسپايدى. ولار وقيعاعا قاتىسۋشىلار ەمەس، قوسىمشا ەكيپاج مۇشەلەرى بولعان جانە ۇشاقتى امان-ەسەن قوندىرۋعا كومەكتەسكەن»،– دەلىنگەن حابارلامادا.
باسىلىم مالىمەتىنشە، قوسىمشا ەكيپاج مۇشەلەرى دۋبايدان تەل-اۆيۆكە باعىت العان رەيستە جولاۋشى رەتىندە ۇشىپ كەلە جاتقان. توتەنشە جاعدايعا دەيىن ولار ۇشاقتى باسقارۋعا قاتىسپاعان. وقيعادان كەيىن رەسەيلىك جانە ۋكراينالىق ۇشقىشتار ۇشقىشتار كابيناسىنا كىرىپ، باسقارۋدى ءوز قولدارىنا الىپ، Boeing ۇشاعىن ساۋد ارابياسىنىڭ تابۋك قالاسىنا ءساتتى قوندىرعان.
30 قىركۇيەك كۇنى تاڭەرتەڭ N12 تەلەارناسى جانجال رەسەيلىك ۇشقىش پەن ۋكراينالىق ەكىنشى ۇشقىش اراسىندا بولعان دەپ مالىمدەگەن ەدى. كەيىن توبەلەسكە قاتىسۋشىلاردىڭ ازاماتتىعىنا قاتىستى وزگە دە مالىمەتتەر تاراي باستادى. ال Flydubai كومپانياسى نەگىزگى ەكيپاج مۇشەلەرىنىڭ كىم ەكەنىن جانە وقيعانىڭ ناقتى ءمان-جايىن ازىرگە جاريالاعان جوق.
وقيعادان كەيىن اۋە كومپانياسىندا قاۋىپسىزدىك شارالارى كۇشەيتىلدى. Israel Hayom باسىلىمىنىڭ جازۋىنشا، ەندى Flydubai ەكيپاجدارى مۇقيات تەكسەرۋدەن وتەدى.
سونىمەن قاتار يزرايل بيلىگى ساۋد ارابياسىندا قالىپ قويعان ءوز ازاماتتارىن ەلگە قايتارۋعا دايىندالىپ جاتىر. ول ءۇشىن ارنايى ەۆاكۋاتسيالىق رەيس ۇيىمداستىرۋ جوسپارلانعان. الايدا ونىڭ ۇشۋى الدىمەن ساۋد ارابياسى بيلىگىنىڭ كەلىسىمىن الۋى ءتيىس.
ايتا كەتەيىك، توتەنشە وقيعا 30 قىركۇيەك كۇنى تاڭەرتەڭ دۋبايدان تەل-اۆيۆكە باعىت العان FZ1073 رەيسىندە بولعان. ۇشۋ كەزىندە Boeing 737 دابىل سيگنالدارىن، ونىڭ ىشىندە اۋە كەمەسىن زاڭسىز باسىپ الۋ نەمەسە باسقارۋعا ارالاسۋ قاۋپى تۋىنداعاندا قولدانىلاتىن ارنايى كودتى جىبەرگەن. سونىمەن قاتار ۇشاق بيىكتىگىن كۇرت جوعالتقان. Reuters اگەنتتىگىنىڭ مالىمەتىنشە، ول 30 سەكۋندقا جەتپەيتىن ۋاقىت ىشىندە شامامەن 14 مىڭ فۋتقا (4,3 شاقىرىمعا جۋىق) تومەندەگەن.
يزرايلدىك دەرەككوزدەر ۇشقىشتار كابيناسىندا فيزيكالىق جانجال بولعانىن حابارلادى. نۇسقالاردىڭ بىرىنە سايكەس، ەكىنشى ۇشقىش اۋە كەمەسىنىڭ كاپيتانىنا شابۋىل جاساعان. قازىرگى ۋاقىتتا يزرايل بيلىگى بۇل وقيعانىڭ تەررورلىق ارەكەتكە قاتىسى بار-جوعىن تەكسەرىپ جاتىر. وقيعانىڭ ناقتى سەبەبى ازىرگە انىقتالعان جوق.
وقيعادان كەيىن Boeing باعىتىن وزگەرتىپ، ساۋد ارابياسىنىڭ تابۋك اۋەجايىنا قونعان. Flydubai كومپانياسى وقيعانى راستاپ، بارلىق جولاۋشىنىڭ قاۋىپسىز ەكەنىن مالىمدەدى. اۋە تاسىمالداۋشىسى قۇزىرلى ورگاندارمەن بىرلەسىپ جۇمىس ىستەپ جاتقانىن جانە راستالعان اقپارات تۇسكەن سوڭ قوسىمشا مالىمەت بەرەتىنىن حابارلادى.
