بىرىككەن اراب امىرلىكتەرى مەن يزرايل باسشىلىعى اراسىنداعى بايلانىستار جابىق كەلىسسوزدەردىڭ مازمۇنى تۋرالى اقپارات قوعام نازارىن اۋداردى، دەپ حابارلايدى "ادىرنا".
شەتەلدىك باق دەرەگىنشە، ءباا پرەزيدەنتى مۇحاممەد بەن زايد ءال ناحايان 27 قىركۇيەكتە ابۋ-دابيدە يزرايل پرەمەر-ءمينيسترى بينيامين نەتانياحۋدى قابىلدادى.
تاراپتار ەكىجاقتى قارىم-قاتىناستاردى جانە ونى نىعايتۋ جولدارىن تالقىلاعان. يزرايل پرەمەر-ءمينيسترىنىڭ كەڭسەسى نەتانياحۋدىڭ ءباا-گە پرەزيدەنتتىڭ شاقىرۋىمەن بارعانىن حابارلادى. كەلىسسوزدەر بارىسىندا وڭىردەگى وزەكتى ماسەلەلەر دە قارالعان.
نەتانياحۋمەن بىرگە ابۋ-دابيگە يزرايل ۇلتتىق قاۋىپسىزدىك كەڭەسىنىڭ جانە «موسساد» بارلاۋ قىزمەتىنىڭ باسشىلارى، پرەمەر-ءمينيستردىڭ اسكەري حاتشىسى جانە سىرتقى ساياسات جونىندەگى كەڭەسشىسى بارعان.
Reuters اگەنتتىگى كەلىسسوزدەردىڭ نەگىزگى تاقىرىبى يران بولعانىن حابارلادى. الايدا نەتانياحۋدىڭ كەڭسەسى تالقىلانعان وڭىرلىك ماسەلەلەردىڭ ناقتى ءتىزىمىن جاريالامادى.
ال Haaretz 28 قىركۇيەكتە اتى-ءجونى اتالماعان دەرەككوزدەرگە سىلتەمە جاساپ، نەتانياحۋ كەزدەسۋدە ءباا پرەزيدەنتىنەن اتالعان تەلەفون ارقىلى سويلەسۋ تۋرالى اقپاراتتى جوققا شىعارۋدى سۇراعانىن جازدى. باسىلىمنىڭ مالىمەتىنشە، يزرايل پرەمەر-ءمينيسترى سونداي-اق 2023 جىلعى 7 قازان قارساڭىنداعى وقيعالارعا قاتىستى ءوزىن «ىڭعايسىز جاعدايعا قالدىرۋى مۇمكىن» وزگە دە مالىمەتتەردى جوققا شىعارۋدى جانە ءباا باسشىسىنىڭ «مورالدىق قولداۋىن» سۇراعان.
يزرايل مەن ءباا 2020 جىلى «اۆراام كەلىسىمدەرى» اياسىندا ديپلوماتيالىق قارىم-قاتىناس ورناتقان.
