بۇۇ-نىڭ تاۋەلسىز حالىقارالىق كوميسسياسى ءيزرايلدىڭ گازا سەكتورىنداعى ارەكەتتەرىن گەنوتسيد دەپ تانىدى، دەپ حابارلايدى "ادىرنا" ۇلتتىق پورتالى.
كوميسسيانىڭ ەسەبىندە يزرايل بيلىگى پالەستينالىقتاردىڭ ۇرپاق ءوربىتۋ الەۋەتىن جويۋعا باعىتتالعان شارالار قابىلداپ، ولاردىڭ تىرشىلىك جاعدايىن ادەيى اۋىرلاتقانى ايتىلعان.
كوميسسيا ءتورايىمى ناۆي پيللاي:
«كوميسسيا ءيزرايلدىڭ گازا سەكتورىندا گەنوتسيد جاساعانى ءۇشىن جاۋاپتى دەپ قورىتىندىعا كەلدى. بۇل جاۋاپكەرشىلىك پالەستينالىقتاردى قورلايتىن اشىق مالىمدەمەلەر جاساپ وتىرعان يزرايل بيلىگىنىڭ جوعارعى ەشەلوندارىنا جۇكتەلەدى»، – دەدى.
ەسەپتە ءيزرايلدىڭ قاۋىپسىزدىك كۇشتەرى كونۆەنتسيادا كورسەتىلگەن بەس گەنوتسيدتىك ارەكەتتىڭ تورتەۋىن جۇزەگە اسىرعانى كورسەتىلدى. ناقتىراق، جاپپاي ءولتىرۋ، اۋىر دەنە جانە پسيحولوگيالىق زيان كەلتىرۋ جانە جويۋعا باعىتتالعان ءومىر ءسۇرۋ جاعدايلارىن جاساۋ، ۇرپاق وربىتۋگە شەكتەۋ قويۋ.
سونىمەن قاتار، كوميسسيا گۋمانيتارلىق كومەكتى بۇعاتتاۋ، ادەيى اشتىق تۋعىزۋ، دەنساۋلىق ساقتاۋ مەن ءبىلىم بەرۋ جۇيەلەرىن قيراتۋ، پالەستينالىقتارعا قارسى جۇيەلى سەكسۋالدىق جانە گەندەرلىك زورلىق-زومبىلىق فاكتىلەرىن تىركەدى.
«حالىقارالىق قاۋىمداستىق گەنوتسيدتىڭ ايقىن بەلگىلەرى پايدا بولعاندا ءۇنسىز قالا المايدى. ارەكەتسىزدىك – سوۋچاستىقپەن تەڭ»، – دەپ قوستى ناۆي پيللاي.
بۇعان قوسا، بۇۇ-نىڭ ادام قۇقىقتارى جونىندەگى كەڭەسى ءيزرايلدىڭ كاتاردا حاماس ساياسي جەتەكشىلىگىنە جاساعان سوققىسىنان كەيىن شۇعىل دەبات وتكىزدى. شابۋىل كەزىندە التى ادام قازا تاپقان، ولاردىڭ بەسەۋى حاماس مۇشەلەرى بولعان. بۇۇ باس حاتشىسى انتونيۋ گۋتەرريش بۇل ارەكەتتى كاتاردىڭ ەگەمەندىگىن بۇزۋ دەپ اتادى
