قازاقستان حالىق كەڭەسىنىڭ مۇشەلەرى شاحمۇرات ءمۇتالىپ پەن گادجي گادجيەۆ كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ وتباسىلارىنا قارجىلاي كومەك كورسەتەتىندەرىن مالىمدەدى. ەكەۋى دە ەلىمىزدەگى جاڭا كونسۋلتاتيۆتىك ورگاننىڭ قۇرامىنا كىرەدى، دەپ حابارلايدى "ادىرنا".
كاسىپكەر ءارى قازاقستان بوكس فەدەراتسياسىنىڭ پرەزيدەنتى شاحمۇرات ءمۇتالىپ Integra Construction KZ كومپانياسى قازا تاپقان ءار اسكەري قىزمەتشىنىڭ وتباسىنا 25 ميلليون تەڭگەدەن بولەتىنىن ايتتى.
«كومەك مەملەكەتتىك قولداۋعا قوسىمشا رەتىندە ءار وتباسىعا جەكە باعىتتالىپ كورسەتىلەدى»، – دەپ جازدى شاحمۇرات ءمۇتالىپ.
ول قازاقستان حالىق كەڭەسىنىڭ مۇشەسى ءارى كاسىپكەر رەتىندە قازا تاپقان اسكەري قىزمەتشىلەردىڭ وتباسىلارىمەن بىرگە قايعىنى ءبولىسۋ ءوز پارىزى دەپ سانايتىنىن اتاپ ءوتتى.
«ارينە، ەشقانداي قارجى اتا-اناعا بالاسىن قايتارا المايدى. بىراق ءدال وسىنداي ساتتە ەشبىر وتباسى قايعىسىمەن جالعىز قالماۋى كەرەك»، – دەلىنگەن ونىڭ ۇندەۋىندە.
قازاقستان حالىق كەڭەسىنىڭ تاعى ءبىر مۇشەسى، قازاقستان اۋىر اتلەتيكا فەدەراتسياسىنىڭ پرەزيدەنتى گادجي گادجيەۆ تە قازا بولعان اسكەري قىزمەتشىلەردىڭ وتباسىلارىنا ماتەريالدىق قولداۋ كورسەتۋ تۋرالى شەشىم قابىلداعانىن حابارلادى.
«قازاقستان حالىق كەڭەسىنىڭ مۇشەسى ءارى ەلىمىزدىڭ سپورت قاۋىمداستىعىنىڭ وكىلى رەتىندە قازا تاپقان اسكەري قىزمەتشىلەردىڭ وتباسىلارىنا 100 ميلليون تەڭگە كولەمىندە ماتەريالدىق كومەك كورسەتۋ تۋرالى شەشىم قابىلدادىم»، – دەدى گادجيەۆ.
كەڭەس مۇشەلەرى قازا تاپقانداردىڭ تۋعان-تۋىستارىنا، جاقىندارى مەن ارىپتەستەرىنە كوڭىل ايتتى.
ەسكە سالايىق، 24 قىركۇيەكتە كاسپي تەڭىزىنىڭ جاعالاۋىندا وقۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋىنەن اسكەري قىزمەتشىلەردى تەڭىز اعىزىپ كەتكەن.
ۇكىمەتتىك كوميسسيانىڭ ناقتىلاعان مالىمەتىنە سايكەس، تەڭىزگە 17 اسكەري قىزمەتشى كەتكەن. ونىڭ 14-ءى قازا تاپتى، ۇشەۋى قۇتقارىلدى.
قايعىلى وقيعاعا بايلانىستى قىلمىستىق ءىس قوزعالدى. وقيعانىڭ ءمان-جايىن انىقتاۋ ءۇشىن ارنايى جەدەل-تەرگەۋ توبى قۇرىلدى.
قازاقستان پرەزيدەنتى قاسىم-جومارت توقاەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
