فوتو: ماڭعىستاۋ وبلىسىنىڭ اكىمدىگى
قازاقستان پرەمەر-ءمينيسترىنىڭ ورىنباسارى قانات بوزىمباەۆ باستاعان ۇكىمەتتىك كوميسسيا ماڭعىستاۋ وبلىسىندا بولعان توتەنشە جاعداي ورنىندا جۇمىسىن جالعاستىرىپ جاتىر. وقيعاعا قاتىستى جاڭا مالىمەتتەر جاريالاندى، دەپ حابارلايدى "ادىرنا".
ناقتىلاعان اقپاراتقا سايكەس، وقۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋىنە بايلانىستى تەڭىزگە 17 اسكەري قىزمەتشى اعىپ كەتكەن. ولاردىڭ 12-ءسى قازا تاپقان، ۇشەۋىن قۇتقارۋ مۇمكىن بولعان. قازىر تاعى ەكى اسكەري قىزمەتشىنى ىزدەۋ جۇمىستارى جالعاسىپ جاتىر.
قانات بوزىمباەۆ جوعالعان ساربازداردى ىزدەستىرۋ جۇمىستارىن تاۋلىك بويى ۇزدىكسىز جۇرگىزۋدى تاپسىردى. بۇل رەتتە بارلىق قاجەتتى كۇشتەر مەن قۇرالداردى جۇمىلدىرۋ مىندەتتەلدى.
سونىمەن قاتار قازا تاپقان اسكەري قىزمەتشىلەردىڭ وتباسىلارىنا قاجەتتى ماتەريالدىق جانە وزگە دە كومەك كورسەتۋدى قامتاماسىز ەتۋ تاپسىرىلدى.
قازىرگى تاڭدا بيلىك ءۇشىن باستى مىندەت – ءالى دە ورنالاسقان جەرى انىقتالماعان ەكى اسكەري قىزمەتشىنى تابۋ.
ەسكە سالايىق، قانات بوزىمباەۆ بولعان وقيعانى تەرگەۋ ءۇشىن قۇرىلعان ۇكىمەتتىك كوميسسياعا جەتەكشىلىك ەتەدى.
