جەتىسۋ وبلىسىندا قانت قىزىلشاسىن جيناۋ جۇمىستارى باستالدى. بيىل ءتاتتى ءتۇبىر 13,5 مىڭ گەكتار جەرگە ەگىلدى، بۇل وتكەن جىلعى كورسەتكىشتەن 1,3 مىڭ گەكتارعا ارتىق. بولجام بويىنشا، ءوڭىر شارۋاشىلىقتارى شامامەن 585 مىڭ توننا قانت قىزىلشاسىن جيناۋدى جوسپارلاپ وتىر.
وبلىستىق اۋىل شارۋاشىلىعى باسقارماسىنىڭ مالىمەتىنشە، ءونىم جيناۋ ناۋقانىنا اقسۋ، سارقان، ەسكەلدى، كوكسۋ، قاراتال، كەربۇلاق اۋداندارىنىڭ شارۋاشىلىقتارى كىرىستى. جيىن-تەرىن جۇمىستارىنا 115 قىزىلشا جينايتىن كومباين جانە 52 جاپىراق جينايتىن ماشينا جۇمىلدىرىلادى. قولدا بار تەحنيكا تاۋلىگىنە 700 گەكتارعا دەيىن ءونىم جيناي الادى.
ءونىم جيناۋعا كىرىسكەن شارۋاشىلىقتاردىڭ ءبىرى – كوكسۋ اۋدانىنداعى «قىدىرالى» شارۋا قوجالىعى. مۇنداعى 327 گەكتار اۋىل شارۋاشىلىعى القابىنىڭ 160 گەكتارىنا قانت قىزىلشاسى ەگىلگەن. سونىمەن قاتار شارۋاشىلىق داندىك جانە سۇرلەمدىك جۇگەرى، كوكونىس جانە جوڭىشقا وسىرەدى.
بيىل قىزىلشا وسىرۋشىلەر ەرتە پىسەتىن «اۆانتاج» سۇرپىنا باسىمدىق بەرگەن. الدىن الا بولجامدار بويىنشا، ونىمدىلىك گەكتارىنا 700 تسەنتنەرگە دەيىن جەتەدى.
«بۇگىن قىزىلشا قازۋعا كىرىستىك. ءونىم جاقسى، گەكتارىنان شامامەن 650–700 تسەنتنەردەن الامىز دەپ وتىرمىز. سۋارمالى سۋ جاعىنان ماسەلە بولعان جوق، ءونىم جاقسى شىقتى. ەندى باستىسى – وسىرىلگەن ءونىمدى ىسىراپسىز جيناپ، وڭدەۋگە تاپسىرساق دەيمىز»، - دەيدى «قىدىرالى» شارۋا قوجالىعىنىڭ باسشىسى ەرلان شەڭگەلباەۆ.
شارۋاشىلىق قانت قىزىلشاسىن وسىرۋمەن شامامەن 15 جىلدان بەرى اينالىسىپ كەلەدى. فەرمەردىڭ ايتۋىنشا، بۇل داقىل وسىمدىك شارۋاشىلىعىنداعى ەڭ تارتىمدى باعىتتاردىڭ ءبىرى بولىپ وتىر.
«قىزىلشا – ءبىز ءۇشىن ەڭ تابىستى داقىلداردىڭ ءبىرى، سوندىقتان وسى باعىتتا جۇمىس ىستەپ كەلەمىز. مەملەكەت تاراپىنان قولداۋ بار: تىڭايتقىشتار مەن پرەپاراتتارعا سۋبسيديا قاراستىرىلعان. قانت قىزىلشاسىن شامامەن 15 جىلدان بەرى تابىستى ءوسىرىپ كەلەمىز»، - دەدى شارۋاشىلىق وكىلى.
«قىدىرالى» شارۋا قوجالىعىنىڭ اۋىل شارۋاشىلىعى تەحنيكاسى جەتكىلىكتى: بەس متز تراكتورى، ءۇش استىق جينايتىن جانە ءبىر قىزىلشا جينايتىن كومباين، ءتورت كاماز، سونداي-اق سەپكىشتەر مەن باسقا دا قاجەتتى اگرەگاتتار بار. شارۋالاردىڭ ايتۋىنشا، سوڭعى ەكى جىلدا تەحنيكانى شارۋاشىلىقتار ليزينگ ارقىلى ساتىپ الۋدا، بۇل دا شارۋاشىلىققا كورسەتىلىپ وتىرعان قولداۋدىڭ ءبىر ءتۇرى.
جالپى بيىل كوكسۋ اۋدانىندا 185 شارۋا قوجالىعى قانت قىزىلشاسىن 2,9 مىڭ گەكتارعا ەكتى. بۇل وتكەن جىلعى كورسەتكىشتەن مىڭ گەكتارعا كوپ. كۇتىلەتىن جالپى ءونىم كولەمى شامامەن 130 مىڭ توننا. جيىن-تەرىن ناۋقانىنا اۋداندا 27 قىزىلشا جينايتىن كومباين، 10 جاپىراق جينايتىن ماشينا جانە 70–80 جۇك اۆتوكولىگى دايىندالدى.
ء«وز تەحنيكاسى بار شارۋاشىلىقتار تەحنيكاسى جوق شارۋالارعا كومەكتەسەدى. سونىمەن قاتار ەكى سەرۆيستىك دايىنداۋ ورتالىعى قولداۋ كورسەتەدى. جۇمىس كۇشى جەتكىلىكتى، سوندىقتان ناۋقاندى ءوز كۇشىمىزبەن وتكىزەمىز دەپ وتىرمىز»، - دەپ ءتۇسىندىردى كوكسۋ اۋدانى اكىمىنىڭ ورىنباسارى ەرجان شالقىبەكوۆ.
ءونىمدى وڭدەۋگە تاپسىرۋ ءىسىن ۇيىمداستىرۋعا دا ەرەكشە كوڭىل بولىنگەن. بەكىتىلگەن كەستەگە سايكەس اقسۋ جانە كوكسۋ قانت زاۋىتتارىندا قانت قىزىلشاسىن قابىلداۋ 25 قىركۇيەكتە باستالادى. بۇل ءتارتىپ تۇسەتىن ءونىم كولەمىن رەتتەپ، قانت قىزىلشاسىن وڭدەۋگە تاپسىرۋ كەزىندە كەزەكتىڭ پايدا بولۋ قاۋپىن ازايتۋعا مۇمكىندىك بەرەدى.
ء«اربىر شارۋا قوجالىعى بويىنشا گەكتار كولەمى مەن ءونىم كولەمىنە قاراي كەستە جاسالدى. ءونىمدى تاپسىرۋ وسى كەستەگە سايكەس جۇزەگە اسىرىلادى. الدىمەن زاۋىت ەرتە پىسەتىن «اۆانتاج» سۇرپىن قابىلدايدى. كوكسۋ قانت زاۋىتىنا ءونىمدى ءبىزدىڭ اۋداننىڭ، سول سياقتى كەربۇلاق، ەسكەلدى، قاراتال اۋداندارىنىڭ جانە تالدىقورعاننىڭ شارۋاشىلىقتارى اكەلەدى. ءونىم قابىلداۋ كەزەڭ-كەزەڭىمەن ۇلعايتىلادى: باستاپقى كەزەڭدە تاۋلىگىنە شامامەن 2 مىڭ توننا، كەيىن 3 مىڭ تونناعا جۋىق، ال كاسىپورىن قاجەتتى قۋاتىنا شىققان سوڭ كۇنىنە 3,5–4 مىڭ تونناعا دەيىن قابىلداۋ جوسپارلانىپ وتىر»، - دەدى ە. شالقىبەكوۆ.
جاڭعىرتۋدان كەيىن جانە وندىرىستىك قۋاتى ارتتىرىلعان سوڭ كوكسۋ قانت زاۋىتى بيىلعى ماۋسىمدا 374 مىڭ توننا قانت قىزىلشاسىن قابىلداۋدى جوسپارلاپ وتىر. ال وتكەن جىلى
شامامەن 250 مىڭ توننا قابىلدانعان.
جالپى بيىلعى ماۋسىمدا جەتىسۋ وبلىسىندا قانت قىزىلشاسىنىڭ ەگىس القابى دا، كۇتىلەتىن ءونىم كولەمى دە ارتىپ وتىر. بولجامدى كورسەتكىشتەرگە قول جەتكىزىلگەن جاعدايدا، ءوڭىر شارۋالارى وتكەن جىلمەن سالىستىرعاندا 86 مىڭ توننادان استام ءونىمدى ارتىق جينايدى.
