اقش-تىڭ سەنت-لۋيس قالاسىنداعى بالالار كلينيكاسىندا باس سۇيەگى ءبىتىسىپ تۋعان ەكى جاسار سيام ەگىزدەرى حياب پەن ۆۋحبتوعا كۇردەلى وپەراتسيا جاسالدى، دەپ حابارلايدى "ادىرنا" ءتىلشىسى ABC News-كە سىلتەپ.
حيرۋرگتەر قىزداردى ءساتتى اجىراتقان.
وپەراتسيا 24 ساعاتتان استام ۋاقىتقا سوزىلعان. وعان ءارتۇرلى مەديتسينالىق باعىتتاعى مامانداردان قۇرالعان كوپسالالى دارىگەرلەر توبى قاتىستى.
ەگىز قىزدار ەفيوپيادا دۇنيەگە كەلگەن. ولار وپەراتسياعا دەيىنگى دايىندىقتان ءوتۋ ءۇشىن 2025 جىلعى ناۋرىزدا اقش-قا كەلگەن. 2026 جىلعى ناۋرىزدا قىزدار ەكى جاسقا تولعان.
قازىر حياب پەن ۆۋحبتو مەريلەند-حايتس قالاسىنداعى رانكەن دجوردان پەدياتريالىق ورتالىعىندا قارقىندى ەم الىپ، وڭالتۋ كەزەڭىنەن ءوتىپ جاتىر. دارىگەر نيك حوۋلكامپتىڭ ايتۋىنشا، ولاردىڭ جاعدايىندا وڭ ديناميكا بايقالادى.
قىزدار جەكە وڭالتۋ جاتتىعۋلارىنا قاتىسىپ ءجۇر. وپەراتسياعا دەيىن ورىنداي الماعان قاراپايىم ارەكەتتەردى مەڭگەرە باستاعان. اتاپ ايتقاندا، ولار تىك وتىرا الادى. سونىمەن قاتار وزدىگىنەن تاماقتانۋ، سويلەۋ جانە ءبىر-بىرىمەن قارىم-قاتىناس جاساۋ داعدىلارىن دامىتىپ، بىرگە ويناۋعا ۇيرەنىپ جاتىر. الداعى ۋاقىتتا ماماندار ولاردىڭ وزدىگىنەن تۇرىپ، قوزعالۋ قابىلەتىن قالىپتاستىرۋدى كوزدەپ وتىر.
دارىگەردىڭ ايتۋىنشا، باس سۇيەگى تۇسىنان ءبىتىسىپ تۋعان ەگىزدەردى اجىراتۋ – سيرەك كەزدەسەتىن ءارى كۇردەلى مەديتسينالىق جاعدايلاردىڭ ءبىرى. مۇنداي وپەراتسياعا ءارتۇرلى سالاداعى حيرۋرگتەر مەن مەديتسينا ماماندارى قاتىسادى جانە ودان كەيىن ۇزاق وڭالتۋ كەزەڭى قاجەت.
