2025 جىلدىڭ 4–6 قاراشاسى ارالىعىندا ازەربايجان استاناسى باكۋدە ەۋروپا راۆۆيندەرىنىڭ حالىقارالىق كونفەرەنتسياسى وتەدى، دەپ حابارلايدى "ادىرنا" ۇلتتىق پورتالى يزرايلدىك Jewish News Syndicate باسىلىمىنا سىلتەمە جاساپ.
مۇسىلمان ەلىندە العاش رەت وتەتىن بۇل اۋقىمدى جيىنعا 500-دەن استام راۆۆين قاتىسادى دەپ كۇتىلۋدە. كونفەرەنتسيا ەۋروپاداعى ورتودوكسالدى راۆۆيندەردىڭ باستى ۇيىمىنىڭ 70 جىلدىق مەرەيتويىنا وراي ۇيىمداستىرىلىپ وتىر.
كونفەرەنتسيانى ۇيىمداستىرۋشى – ەۋروپا راۆۆيندەرى كونفەرەنتسياسى (Conference of European Rabbis). بۇل ۇيىم 1956 جىلى قۇرىلعان جانە بۇگىندە 700-دەن استام ورتودوكسالدى ءراۆۆيندى بىرىكتىرەدى. ۇيىم ەۋروپاداعى ەۆرەيلەردىڭ ءدىني قۇقىقتارىن قورعاۋمەن اينالىسادى.
شارانىڭ ازەربايجاندا وتكىزىلۋى كەزدەيسوق ەمەس. ەل تاريحىندا ەۆرەيلەرمەن قارىم-قاتىناس ءاردايىم ءوزارا قۇرمەت پەن تاتۋلىققا نەگىزدەلگەن. بۇگىندە ازەربايجاندا شامامەن 30 مىڭعا جۋىق ەۆرەي ۇلت وكىلى تۇرادى. ولار مۇسىلمان حالقى باسىم ەلدە بەيبىت جانە قاۋىپسىز ءومىر ءسۇرىپ وتىر.
كونفەرەنتسيا پرەزيدەنتى پينحاس گولدشميدت ەلدىڭ ءدىني توزىمدىلىككە نەگىزدەلگەن ۇستانىمىن ەرەكشە اتاپ ءوتتى.
«ازەربايجانداعى ەۆرەي قاۋىمىنىڭ ءومىرى – جارقىن ءارى تەرەڭ تاريحي تامىرى بار. بۇل – ۆاۆيلوندىق قۋعىن-سۇرگىن مەن پارسى يمپەرياسى كەزەڭىنەن باستاۋ العان تاريح. ازەربايجان – زايىرلى، تولەرانتتى جانە ينكليۋزيۆتى قوعامنىڭ جارقىن ۇلگىسى. وسى ساپار بارىسىندا ءبىز ازىربايجاندىق ەۆرەيلەرمەن كەزدەسىپ، مەملەكەت باسشىلىعىمەن اشىق ديالوگ جۇرگىزۋدى جوسپارلاپ وتىرمىز»، – دەدى ول.
