Jazdyŋ üş aiynda «Burabai» ūlttyq parkıne millionǧa juyq turist kelgen. Būl rette aumaqqa keluşılerdıŋ ekologiialyq negızdelgen normasy 890 myŋ adamdy qūraidy. 2026 jylǧy turistık mausymnyŋ qorytyndysy turaly brifingte Aqmola oblysynyŋ turizm basqarmasynyŋ basşysy Andrei Podgurskii mälımdedı.
Jalpy öŋırdegı turistık aǧyn ösıp keledı. Bırınşı jartyjyldyqta resmi ornalastyru oryndarynda 350 myŋnan astam adam qabyldandy. Būl ötken jyldyŋ säikes kezeŋımen salystyrǧanda 23 paiyzǧa köp. Demaluşylardyŋ şamamen 99 paiyzyn Qazaqstan tūrǧyndary qūrady. Jyl qorytyndysy boiynşa oblysqa ekı millionnan astam turist keledı dep kütılude.
«Jaz mezgılı dästürlı türde öŋırımız üşın basty synaq boldy. Biyl aptap ystyqqa bailanysty ūlttyq parkterge tüsetın jükteme barynşa joǧary boldy. Soǧan qaramastan, infraqūrylym öz mındetın atqardy. Turister aǧyny Qazaqstandaǧy ışkı turizmnıŋ tūraqty ösıp kele jatqanyn körsettı», – dedı Andrei Podgurskii.
Basqarma mälımetınşe, biylǧy mausymda Şuchinsk-Burabai kurorttyq aimaǧynda turistık infraqūrylymdy damytu jūmystary jalǧasty. Mūnda 200-den astam resmi ornalastyru nysany jäne 29 jabdyqtalǧan jaǧajai jūmys ısteidı. Mausym aiynda Burabai kölınıŋ jaǧasynda jaŋa munisipaldyq jaǧajai aşylyp, kölde elektrlı özen tramvailary ıske qosyldy. Al Zerendıge jaz ailarynda şamamen 100 myŋ adam kelgen.
Sonymen qatar demaluşylardyŋ köp boluy tabiǧi aumaqtarǧa tüsetın jüktemenı de arttyrady. Jazdyŋ üş aiynda «Burabaidan» şamamen 500 tonna qoqys şyǧaryldy. Taǧy 200 tonnaǧa juyq qaldyq «Kökşetau» MŪTP aumaǧynda, onyŋ ışınde Zerendı audanynda jinaldy. Jyl soŋyna deiın Burabai jäne Zerendı audandarynda organikalyq qaldyqtardy komposttau keşenderın ıske qosu josparlanyp otyr.
