سانكت-پەتەربۋرگتەگى «سمولنينسكوە» مۋنيتسيپالدىق قۇرىلىمىنىڭ (مو) كەڭەسى مەملەكەتتىك دۋمانىڭ دەپۋتاتتارىن رەسەي پرەزيدەنتى ۆلاديمير ءپۋتيندى ۋكرايناعا قارسى سوعىس باستاعانى ءۇشىن ساتقىندىق جاسادى دەپ ايىپتاۋعا شاقىرۋ تۋرالى شەشىم قابىلدادى. بۇل تۋرالى 8 قىركۇيەكتە «سمولنينسكوە» مۋنيتسيپاليتەتىنىڭ دەپۋتاتى دميتري پاليۋگا مالىمدەدى، دەپ حابارلايدى “ادىرنا” ءتىلشىسى.
«شەشىمدى جينالعان دەپۋتاتتاردىڭ كوپشىلىگى قولدادى»، - دەپ جازدى پاليۋگا.
بىراق قانشا ادام جاقتاپ داۋىس بەرگەنىن ايتپادى.
سونداي-اق، ول مەملەكەتتىك دۋما دەپۋتاتتارىنا جولداۋ جوسپارلانعان شەشىم مەن ۇندەۋ ماتىندەرىن جاريالادى.
ۇندەۋدە سوعىستا «ەڭبەككە جارامدى جاس ازاماتتار ءولىپ، مۇگەدەك بولىپ جاتقانى»، رەسەي ەكونوميكاسىنىڭ باسقىنشىلىقتارىنان زارداپ شەگىپ جاتقانى، ءپۋتيننىڭ ارەكەتىنىڭ ناتيجەسىندە شۆەتسيا مەن فينلياندياعا قوسىلۋ ارقىلى ناتو بلوگىنىڭ كەڭەيىپ جاتقانى باسا ايتىلعان. سوعىس ماقساتتارىنىڭ ءبىرى ۋكراينانى دەميليتاريزاتسيالاۋ بولدى. بىىراق 24 اقپاننان بەرى كيەۆ 38 ميلليارد دوللارعا جاڭا قارۋ الدى، دەلىنگەن ۇندەۋدە.
"پرەزيدەنت ءپۋتيننىڭ ءوزىن-ءوزى قورعاۋعا كىرىسۋ تۋرالى شەشىمى رەسەي مەن ونىڭ ازاماتتارىنىڭ قاۋىپسىزدىگىنە زيان دەپ سانايمىز. وسىعان بايلانىستى مەملەكەتتىك دۋمانىڭ دەپۋتاتى رەتىندە سىزدەن ايىپ تاعىلۋ تۋرالى ۇسىنىس ەنگىزۋىڭىزدى سۇرايمىز.»، - دەلىنگەن قۇجاتتا.
ناۋرىزدىڭ باسىندا سمولنينسكوە مۋنيتسيپاليتەتىنىڭ دەپۋتاتتارى پۋتينگە سوعىستى توقتاتىپ، وتستاۆكاعا كەتۋگە شاقىرعان ۇندەۋ جولداعان.
“ادىرنا” ۇلتتىق پورتالى
