19 قىركۇيەك الماتىدا قالا كۇنىن اتاپ ءوتۋدىڭ العاشقى كۇنى ءوتتى. قالانىڭ ءتۇرلى الاڭدارىندا ۇيىمداستىرىلعان كونتسەرتتەرگە، فەستيۆالدەرگە، كورمەلەرگە، سپورتتىق جانە شىعارماشىلىق جوبالارعا 500 مىڭنان استام ادام قاتىستى. بۇل تۋرالى قالالىق مادەنيەت باسقارماسىنىڭ وكىلدەرى ايتتى.
نەگىزگى ءىس-شارالار اباي جانە «استانا» الاڭىندا، پانفيلوۆ جانە جىبەك جولى جۇرگىنشى كوشەلەرىندە، سونداي-اق قالانىڭ بارلىق سەگىز اۋدانىندا ءوتتى.
اباي الاڭى
باعدارلاما الماتى اكىمىنىڭ قاتىسۋىمەن وتكەن سالتاناتتى كونتسەرتتەن باستالدى. دارحان ساتىبالدى الماتىلىقتاردى قالا كۇنىمەن قۇتتىقتاپ، قالانىڭ دامۋىنا ەلەۋلى ۇلەس قوسقان ازاماتتارعا «الماتى قالاسىنىڭ قۇرمەتتى ازاماتى» اتاعىن تابىستادى.
ودان كەيىن كورەرمەندەر الدىندا «سازگەن سازى» فولكلورلىق-ەتنوگرافيالىق ءانسامبلى، قازاق مەملەكەتتىك تسيركىنىڭ ارتيستەرى، ASU ۇجىمى جانە «الاتاۋ» ءداستۇرلى ونەر تەاترى ونەر كورسەتتى. كەشتى پيانيست Ratovich پەن NE PROSTO ORCHESTRA قورىتىندىلادى.
كۇنى بويى مۇندا «الما ايماعى»، «شەبەرلەر قالاشىعى»، AI & ROBOT ZONE تاقىرىپتىق ايماقتارى، كرافت ويىندار الاڭى، بالالار ايماعى جانە «اجارلى الماتى» كاسىبي سۋرەتشىلەر بايقاۋى قاتىسۋشىلارىنىڭ جۇمىستارى قويىلعان كورمە جۇمىس ىستەدى. سونداي-اق فۋد-كورت ۇيىمداستىرىلدى.
«استانا» الاڭى
مۇندا ەكى ءىرى كونتسەرتتىك باعدارلاما ءوتتى.
كۇندىز «سەنىم» ۆوكالدىق حورى، «وتىرار سازى» اكادەميالىق وركەسترى، «رابات» ءانسامبلى، «استرا» توبى، Muzart Life جانە باسقا دا ورىنداۋشىلار ونەر كورسەتتى.
كەشكە 110 مىڭنان استام كورەرمەن جيناعان «Almaty Vibes» مۋزىكالىق فەستيۆالى ءوتتى. كونتسەرتتەن بولەك، جۇرتشىلىققا 3D Mapping Show ۇسىنىلدى.
ساحناعا ماقپال ءجۇنىسوۆا، ميراس جۇگىنىسوۆ، KALIFARNIYA, ALPHA, ايدانا مەدەنوۆا، جاندوس قارجاۋباي جانە باسقا دا ارتيستەر شىقتى.
پانفيلوۆ جانە جىبەك جولى كوشەلەرى
پانفيلوۆ كوشەسىندە بالالار جانە ەتنوايماق، ەكو- جانە كينوالاڭ، Digital-ايماق، سپورتتىق كەڭىستىك جانە فۋد-كورت ورنالاستى. نەگىزگى ءىس-شارالاردىڭ ءبىرى ءداستۇرلى الما جارمەڭكەسى بولدى.
ساۋدا قاتارلارى قازىبەك بي كوشەسىنىڭ پانفيلوۆ كوشەسى مەن نازارباەۆ داڭعىلى ارالىعىنداعى بولىگىندە ورنالاستى. جارمەڭكە ساعات 10:00-دەن 18:00-گە دەيىن جۇمىس ىستەدى.
جىبەك جولى كوشەسىندە كونتسەرتتىك باعدارلاما، قۋىرشاق تەاترىنىڭ قويىلىمى جانە شىعارماشىلىق جوبالار ءوتتى. سونداي-اق مۇندا 60-تان استام باسپا مەن كىتاپ دۇكەنى قاتىسقان Kitap Fest كىتاپ جارمەڭكەسى ۇيىمداستىرىلدى.
«الاتاۋ» ءداستۇرلى ونەر تەاترىنىڭ الدىنداعى الاڭدا ءداستۇرلى مۋزىكانىڭ تانىمال ورىنداۋشىلارى مەن قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ قاتىسۋىمەن ء«ان مەن كۇيدىڭ بەسىگى» كونتسەرتى، سونداي-اق «Jana Lep» كونتسەرتى ءوتتى. ساحنادا قازىبەك قۇرايىش، ەربولات قۇدايبەرگەنوۆ، ەركەش حاسەن جانە باسقا دا ارتيستەر ونەر كورسەتتى.
الماتىنىڭ بارلىق اۋدانىندا جەكە مادەني، سپورتتىق جانە شىعارماشىلىق باعدارلاما دايىندالدى.
قالا كۇنىن اتاپ ءوتۋ 20 قىركۇيەكتە جالعاسادى. قالا تۇرعىندارى مەن قوناقتارى ءۇشىن جاڭا كونتسەرتتەر، فەستيۆالدەر جانە وزگە دە قالالىق ءىس-شارالار جوسپارلانعان.
