19 qyrküiek Almatyda Qala künın atap ötudıŋ alǧaşqy künı öttı. Qalanyŋ türlı alaŋdarynda ūiymdastyrylǧan konsertterge, festivalderge, körmelerge, sporttyq jäne şyǧarmaşylyq jobalarǧa 500 myŋnan astam adam qatysty. Būl turaly qalalyq Mädeniet basqarmasynyŋ ökılderı aitty.
Negızgı ıs-şaralar Abai jäne «Astana» alaŋynda, Panfilov jäne Jıbek joly jürgınşı köşelerınde, sondai-aq qalanyŋ barlyq segız audanynda öttı.
Abai alaŋy
Baǧdarlama Almaty äkımınıŋ qatysuymen ötken saltanatty konsertten bastaldy. Darhan Satybaldy almatylyqtardy Qala künımen qūttyqtap, qalanyŋ damuyna eleulı üles qosqan azamattarǧa «Almaty qalasynyŋ Qūrmettı azamaty» ataǧyn tabystady.
Odan keiın körermender aldynda «Sazgen sazy» folklorlyq-etnografiialyq ansamblı, Qazaq memlekettık sirkınıŋ artisterı, ASU ūjymy jäne «Alatau» dästürlı öner teatry öner körsettı. Keştı pianist Ratovich pen NE PROSTO ORCHESTRA qorytyndylady.
Künı boiy mūnda «Alma aimaǧy», «Şeberler qalaşyǧy», AI & ROBOT ZONE taqyryptyq aimaqtary, kraft oiyndar alaŋy, balalar aimaǧy jäne «Ajarly Almaty» käsıbi suretşıler baiqauy qatysuşylarynyŋ jūmystary qoiylǧan körme jūmys ıstedı. Sondai-aq fud-kort ūiymdastyryldy.
«Astana» alaŋy
Mūnda ekı ırı konserttık baǧdarlama öttı.
Kündız «Senım» vokaldyq hory, «Otyrar sazy» akademiialyq orkestrı, «Rabat» ansamblı, «Astra» toby, Muzart Life jäne basqa da oryndauşylar öner körsettı.
Keşke 110 myŋnan astam körermen jinaǧan «Almaty Vibes» muzykalyq festivalı öttı. Konsertten bölek, jūrtşylyqqa 3D Mapping Show ūsynyldy.
Sahnaǧa Maqpal Jünısova, Miras Jügınısov, KALIFARNIYA, ALPHA, Aidana Medenova, Jandos Qarjaubai jäne basqa da artister şyqty.
Panfilov jäne Jıbek joly köşelerı
Panfilov köşesınde balalar jäne etnoaimaq, eko- jäne kinoalaŋ, Digital-aimaq, sporttyq keŋıstık jäne fud-kort ornalasty. Negızgı ıs-şaralardyŋ bırı dästürlı alma järmeŋkesı boldy.
Sauda qatarlary Qazybek bi köşesınıŋ Panfilov köşesı men Nazarbaev daŋǧyly aralyǧyndaǧy bölıgınde ornalasty. Järmeŋke saǧat 10:00-den 18:00-ge deiın jūmys ıstedı.
Jıbek joly köşesınde konserttık baǧdarlama, quyrşaq teatrynyŋ qoiylymy jäne şyǧarmaşylyq jobalar öttı. Sondai-aq mūnda 60-tan astam baspa men kıtap dükenı qatysqan Kitap Fest kıtap järmeŋkesı ūiymdastyryldy.
«Alatau» dästürlı öner teatrynyŋ aldyndaǧy alaŋda dästürlı muzykanyŋ tanymal oryndauşylary men Qūrmanǧazy atyndaǧy Qazaq ūlttyq halyq aspaptar orkestrınıŋ qatysuymen «Än men küidıŋ besıgı» konsertı, sondai-aq «Jana Lep» konsertı öttı. Sahnada Qazybek Qūraiyş, Erbolat Qūdaibergenov, Erkeş Hasen jäne basqa da artister öner körsettı.
Almatynyŋ barlyq audanynda jeke mädeni, sporttyq jäne şyǧarmaşylyq baǧdarlama daiyndaldy.
Qala künın atap ötu 20 qyrküiekte jalǧasady. Qala tūrǧyndary men qonaqtary üşın jaŋa konsertter, festivalder jäne özge de qalalyq ıs-şaralar josparlanǧan.
