اقش پرەزيدەنتى دونالد ترامپ امەريكا اۆياتسياسى يرانداعى فوردو، ناتانز جانە يسفاحان يادرولىق نىساندارىنا سوققى بەرگەنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى ول 21 ماۋسىم كۇنى Truth Social الەۋمەتتىك جەلىسىندەگى پاراقشاسىندا جازدى.
ء«بىز يرانداعى ءۇش يادرولىق نىسان — فوردو، ناتانز جانە يسفاحانعا وتە ءساتتى شابۋىلدى اياقتادىق. بارلىق ۇشاقتار قازىر يران اۋماعىنان تىس جەردە»، - دەدى اقش پرەزيدەنتى.
«باستى نىسان — فوردوعا تولىق بومبا قورىمەن سوققى بەرىلدى. بارلىق ۇشاقتار امان-ەسەن ۇيگە ورالدى. ۇلى امەريكالىق ساربازدارىمىزدى قۇتتىقتايمىز. مۇنى جاساي الاتىن باسقا ارميا جوق. ەندى تىنىشتىق ۋاقىتى تۋدى!» - دەپ تولىقتىردى ول.
ترامپ Truth Social-داعى تاعى ءبىر جازباسىندا بۇل وقيعانى امەريكا قۇراما شتاتتارى، يزرايل جانە بۇكىل الەم ءۇشىن تاريحي ءسات دەپ اتاپ ءوتتى. ول سونداي-اق: «ەندى يران بۇل سوعىستى توقتاتۋعا كەلىسۋى ءتيىس»، - دەدى.
ترامپ ازىرگە ناقتى قانداي بومبالار قولدانىلعانىن ايتقان جوق. اق ءۇي مەن پەنتاگون وپەراتسيانىڭ ەگجەي-تەگجەيىن جاريالامادى.
يران سىرتقى ىستەر مينيسترلىگىنىڭ ءباسپاسوز حاتشىسى ەسمايل باگاي بۇعان دەيىن: «كەز كەلگەن امەريكالىق ارالاسۋ — بۇل ايماقتاعى جاپپاي سوعىس تۋدىرۋى مۇمكىن»، - دەپ مالىمدەگەن بولاتىن.
بۇعان دەيىن اقش پرەزيدەنتى يرانعا قارسى اسكەري سوققى بەرۋ جوسپارىن ماقۇلداعان بولاتىن. الايدا ناقتى قاشان جۇزەگە اسىرىلاتىنى ايتىلماعان ەدى.
