19-20 qyrküiek Qala künıne orai Almatyda Panfilov jäne Jıbek joly jaiau jürgınşıler köşelerı boiynda qala tūrǧyndary men qonaqtaryna arnalǧan auqymdy Alma Qala Fest festivalı ötedı.
Mädeni ıs-şara baǧdarlamasy Almatynyŋ tarihy men zamanaui kelbetın tanystyruǧa, ūlttyq mädeniet pen dästürdı därıpteuge, şyǧarmaşylyq industriiany qoldauǧa jäne qala tūrǧyndaryna türlı formattaǧy demalys ūsynuǧa baǧyttalǧan.
Festival aumaǧynda bırneşe taqyryptyq aimaqtar jūmys ıstep, keluşılerge mädeniet, öner, sport, ekologiia, sifrlyq tehnologiialar, gastronomiia jäne balalarǧa arnalǧan oiyn-sauyq baǧyttaryndaǧy türlı baǧdarlamalarǧa qatysuǧa mümkındık beredı.
Festivaldıŋ negızgı bölıkterınıŋ bırı – alma şaruaşylyqtarynyŋ järmeŋkesı. Järmeŋkege Almaty öŋırındegı 50 alma şaruaşylyǧy qatysyp, 200 tonnadan astam almanyŋ türlı sorttary men türlerın ūsynady. Panfilov Qazybek bi köşelerı alaŋynda keluşıler otandyq öndıruşılerdıŋ önımderımen tanysyp, almanyŋ aluan türınen däm tata alady.
«Almaty» körme aimaǧynda qalanyŋ tarihyn, säuletın, tabiǧatyn jäne özındık kelbetın beineleitın kartinalar körmesı ūiymdastyrylady. Al Elşılıkter alleiasynda qatysuşy memleketterdıŋ mädenietı men dästürlerı tanystyrylady. Körme barysynda ūlttyq öner, qolöner būiymdary, dästürlı mädeni qūndylyqtar men türlı elderdıŋ erekşelıkterı ūsynylady.
Festivaldıŋ zamanaui aimaqtarynyŋ bırı – Digital Zone. Mūnda sifrlyq tehnologiialar men interaktivtı jobalar ūsynylyp, Almaty tarihyna arnalǧan AI-aqparattyq-tanymdyq installiasiialar jūmys ısteidı. Sonymen qatar keluşıler arqan tartys, sadaq atu jäne basqa da interaktivtı oiyndarǧa qatysa alady.
Eco Zone aimaǧy ekologiialyq bastamalar men jobalardy tanystyruǧa arnalsa, Ethno Zone ūlttyq mädeniet, dästür jäne qolönerdı nasihattaidy. Etnoaimaqta qolönerşıler järmeŋkesı ötıp, keluşıler üşın türlı şeberlık sabaqtary ūiymdastyrylady.
Belsendı demalysty ūnatatyndar üşın Sport Zone jūmys ısteidı. Mūnda sporttyq oiyndar, estafetalar jäne ūlttyq oiyndar ötkızıledı. Balalarǧa arnalǧan arnaiy aimaqta kışkentai qonaqtar üşın oiyndar, animatorlar, batuttar, akvagrim, sabyn köpırşıkterı, azottyq şou jäne basqa da oiyn-sauyq baǧdarlamalary ūiymdastyrylady. Festival qonaqtaryna qalanyŋ gastronomiialyq äleuetın tanystyratyn 25 qalalyq meiramhananyŋ arnaiy aimaǧy da ūsynylady.
Kinosüier qauym üşın jeke kino aimaǧy jūmys ısteidı. Baǧdarlama aiasynda «Jas emes jūbailar», «Mädi in China», «Synyptas», «Qolymnan ūsta», «Zaman Back», «Mafiia» jäne qazaq kinosynyŋ altyn qoryna engen filmder körsetıledı. Sonymen qatar körermender «Zaman Back» jäne «Familiia» filmderınıŋ akterlerımen arnaiy kezdesuge qatysa alady.
Festivaldıŋ muzykalyq jäne şyǧarmaşylyq baǧdarlamasy bırneşe sahnada ötedı. Bas sahnada (Astana alaŋy) FEA «Otyrar sazy», MuzartLIFE, Raiym Uaiys, «Ädemı ai» duetı, Qūdaibergen Bekış jäne Erkebūlan Qūmarov öner körsetedı. Kışı sahna №1-de (T. Jürgenov atyndaǧy Qazaq ūlttyq öner akademiiasy janyndaǧy sahna ) Äli Oqapov, Madi Rymbaev, Aqerke Amaliat, Nūrmūhammed Jaqyp, «Hazar» toby, Daro jäne Venera Alpysbaeva öner körsetedı. Al Kışı sahna №2-de (Jıbek joly köşesı) Live band Rockn rolla, immersivtı quyrşaq teatry, «Astra» toby, Nurdaulet Karlov, Alem Kusainova jäne Azamat Torehan öner körsetedı.
Atauly merekelık ıs-şaralardyŋ ötuıne bailanysty Töle bi jäne Qazybek bi köşelerınıŋ Abylai han daŋǧyly men Nazarbaev daŋǧyly aralyǧyndaǧy uchaskelerı 17 qyrküiek saǧat 15:00-den bastap 21 qyrküiek saǧat 03:00-ge deiın uaqytşa jabylady.
