قازاقستان الەمدەگى باسەكەگە قابىلەتتى 40 ەكونوميكانىڭ قاتارىنا كىردى. بۇل تۋرالى حالىقارالىق مەنەدجمەنتتى دامىتۋ ينستيتۋتى (IMD) جاريالاعان World Competitiveness Ranking 2026 رەيتينگىندە كورسەتىلگەن، دەپ حابارلايدى "ادىرنا".
قازاقستان بيىلعى جاھاندىق رەيتينگتە 38-ورىنعا جايعاستى. اتالعان زەرتتەۋ ەلدەردىڭ ەكونوميكالىق جانە بيزنەستىڭ تۇراقتى دامۋىنا قولايلى جاعداي قالىپتاستىرۋ مۇمكىندىگىن باعالايدى.
IMD ەلدەردىڭ باسەكەگە قابىلەتتىلىگىن ءتورت نەگىزگى باعىت بويىنشا سارالايدى. ولار – ەكونوميكانىڭ جاعدايى، مەملەكەتتىك باسقارۋدىڭ تيىمدىلىگى، بيزنەستىڭ تيىمدىلىگى جانە ينفراقۇرىلىم. باعالاۋ بارىسىندا رەسمي ستاتيستيكامەن قاتار، بيزنەس وكىلدەرى اراسىندا جۇرگىزىلگەن ساۋالناما ناتيجەلەرى دە ەسكەرىلەدى.
قازاقستان بىرقاتار كورسەتكىش بويىنشا جوعارى ناتيجەگە قول جەتكىزگەن. اتاپ ايتقاندا، سالىق ساياساتى بويىنشا 9-ورىنعا، حالىقارالىق ساۋدادا 19-ورىنعا، ەڭبەك نارىعى مەن باسقارۋ تاجىريبەسى بويىنشا 20-ورىنعا يە بولدى. سونداي-اق بيزنەستەگى قۇندىلىقتار مەن ۇستانىمدار كورسەتكىشى بويىنشا دا قازاقستان 20-ساتىعا تۇراقتاعان.
بۇدان بولەك، جۇمىسپەن قامتۋ سالاسىندا ەل 26-ورىندى، ينستيتۋتسيونالدىق ورتا بويىنشا 29-ورىندى، ونىمدىلىك پەن تيىمدىلىك كورسەتكىشىندە 32-ورىندى يەلەندى. ال ىشكى ەكونوميكا بويىنشا قازاقستان 33-ورىنعا جايعاستى.
حالىق سانى 20 ميلليوننان اساتىن مەملەكەتتەر اراسىندا قازاقستان 15-ورىندا تۇر. ال ەۋروپا، تاياۋ شىعىس جانە افريكا ەلدەرى كىرەتىن توپتا رەسپۋبليكا 25-ساتىدان كورىندى.
زەرتتەۋ مالىمەتىنشە، 2025 جىلى قازاقستاننىڭ جالپى ىشكى ءونىمى 306,2 ميلليارد دوللاردى قۇراعان. ەل ەكونوميكاسىنىڭ ناقتى ءوسىمى 6,5 پايىزعا جەتىپ، بۇل كورسەتكىش بويىنشا قازاقستان رەيتينگكە ەنگىزىلگەن ەكونوميكالار اراسىندا 6-ورىن العان.
جان باسىنا شاققانداعى ساتىپ الۋ قابىلەتىنىڭ پاريتەتى بويىنشا ءجىو 45 286 دوللاردى قۇرادى. قازاقستانداعى جۇمىس كۇشىنىڭ سانى 9,77 ميلليون ادام دەپ باعالانسا، جۇمىسسىزدىق دەڭگەيى 4,6 پايىز بولدى.
IMD ساراپشىلارى قازاقستان ءۇشىن 2026 جىلعى باسىم مىندەتتەردىڭ قاتارىندا مەملەكەتتىك باسقارۋ جۇيەسىنە جاساندى ينتەللەكت تەحنولوگيالارىن ەنگىزۋدى، جوعارى تەحنولوگيالىق وندىرىستەرگە ينۆەستيتسيا تارتۋدى جانە ترانزيتتىك الەۋەتتى ارتتىرۋدى اتاعان. سونىمەن بىرگە كاسىپتىك ءبىلىم بەرۋ جۇيەسىن جاڭعىرتۋ جانە جاساندى ينتەللەكت نەگىزىندە سۋ رەسۋرستارىن باسقارۋدىڭ زاماناۋي جۇيەسىنە كوشۋ قاجەتتىگى اتاپ ءوتىلدى.
IMD World Competitiveness رەيتينگى 38 جىلدان بەرى جاريالانىپ كەلەدى. ونى ازىرلەۋ كەزىندە حالىقارالىق، ۇلتتىق جانە وڭىرلىك ۇيىمداردىڭ ستاتيستيكالىق دەرەكتەرىمەن قاتار، بيزنەس باسشىلارىنىڭ پىكىرلەرى دە ەسكەرىلەدى. 2026 جىلعى زەرتتەۋگە شامامەن 6900 توپ-مەنەدجەر قاتىسقان.
